ԵՐԵՎԱՆ, 18 ապրիլի — Sputnik. ՀՀ տնտեսական զարգացման և ներդրումների նախարարությունն առաջարկում է ստեղծել նոր` «Հայաստանի պետական հետաքրքրությունների ֆոնդ» փակ բաժնետիրական ընկերություն։
Այս մասին այսօր կառավարության նիստում հայտարարեց նախարար Տիգրան Խաչատրյանը։
Նորաստեղծ հիմնադրամը, նրա խոսքով, պոտենցիալ խոշոր ներդրողներին խորհրդատվություն և աջակցություն կտրամադրի` նպաստելով ՀՀ-ում ներդրումային հոսքերի ավելացմանը, ոլորտային ծրագրերի իրականացմանը և գործարար միջավայրի բարելավմանը։
«Բոլոր այն ծրագրերը, որոնք մինչ այժմ աջակցվում էին «Բիզնես Արմենիա» հիմնադրամի կողմից, այսուհետ այդ սպասարկումն իրականացվելու է ՓՄՁ հիմնադրամի միջոցով»,– ասաց նախարարը` հավելելով, որ նոր հիմնադրամի ստեղծմամբ այդ հատվածը ևս իրենց ուշադրությունից դուրս չի մնա։
Նախարարի առաջարկը կառավարության նիստում միաձայն հաստատվեց։