ԵՐԵՎԱՆ, 19 Ապրիլ — Sputnik. ՀՀ և ՌԴ ղեկավարներ Նիկոլ Փաշինյանն ու Վլադիմիր Պուտինը կարող են հանդիպում ունենալ մայիսի 29-ին:
Ինչպես տեղեկացնում է ՌԻԱ Նովոստին, այս մասին ասել է ՌԴ Դաշնային խորհրդի նախագահ Վալենտինա Մատվիենկոն ՀՀ Ազգային ժողովի նախագահ Արարատ Միրզոյանի հետ հանդիպման ժամանակ։
Նիկոլ Փաշինյանի և Վլադիմիր Պուտինի հանդիպումը նախանշված է Եվրասիական տնտեսական միության բարձրագույն խորհրդի նիստի շրջանակում, որը տեղի է ունենալու Ղազախստանում:
Վալենտինա Մատվիենկոյի խոսքով` Ռուսաստանի Դաշնության և Հայաստանի Հանրապետության քաղաքական փոխգործակցությունը շատ կառուցողական է և դինամիկ:
«Մեր երկրների առաջնորդները նախորդ տարի հանդիպել են 7 անգամ, տեղի են ունենում հեռախոսազրույցներ` նրանք մշտական կապի մեջ են»,–ասել է Մատվիենկոն:
Նա նշել է, որ բացի մայիսի 29-ի հանդիպումից, նման միջոցառում կանցկացվի Երևանում հոկտեմբերի 1-ին, որտեղ նույնպես հնարավորություն կտրվի մեր երկրների առաջնորդներին հանդիպում ունենալու։
Հիշեցնենք, որ Հայաստանի և Ռուսաստանի առաջնորդները վերջին անգամ հանդիպել են 2018–-ի դեկտեմբերի 27–ին, Մոսկվայում։