ԵՐԵՎԱՆ, 23 ապրիլի — Sputnik. ՀՀ նախագահ Արմեն Սարգսյանն այսօր ստորագրել է «Ազգային ժողովի կանոնակարգ» օրենքում լրացումներ և փոփոխություններ կատարելու մասին օրենքը»։ Նախագահի վավերացումով իրավական ուժ ստացավ մի նախագիծ, որին կես տարի առաջ դեմ էր գործող իշխանությունը և որն ամեն գնով փորձում էր ընդունել այն ժամանակ արդեն ընդդիմության դիրքերից հանդես եկող ՀՀԿ–ն։
Խոսքը 2018 թվականի հոկտեմբերի 2-ին ԱԺ արտահերթ նիստում ընդունված նախագծի մասին է, որի համար, հիշեցնենք` ՀՀԿ–ն երեկոյան արտահերթ նիստ էր գումարել։ Նիկոլ Փաշինյանն էլ հանրությանը կոչ էր արել հավաքվել ԱԺ–ի մոտ։
Այդուհանդերձ, ի հեճուկս ԱԺ բակում ընթացող բողոքի ակցիայի, խորհրդարանը 67 կողմ ձայնով ընդունեց նախագիծը:
Բանն այն է, որ օրենքի փոփոխությամբ առաջարկվում էր վարչապետի ընտրության հարցով գումարված Ազգային ժողովի հատուկ նիստը համարել ընդհատված, եթե արտակարգ իրավիճակի կամ այլ խոչընդոտի պատճառով պատգամավորները չեն կարողանում մասնակցել այդ նիստին:
Հետաքրքրական է, որ 2018թ–ին մեծ աղմուկից հետո հոկտեմբերի 2-ի արտահերթ նիստում ընդունված օրենքը այդ ժամանակ ՀՀ նախագահ Արմեն Սարգսյանը չստորագրեց։ Նախագահն այն ուղարկեց Սահմանադրական դատարան` դրա սահմանադրականությունը որոշելու համար։
Միայն կես տարի անց` 2018թ–ի ապրիլի 19-ին Սահմանադրական դատարանը հրապարակեց որոշումը` օրենքը որակելով Սահմանադրությանը համապատասխանող: Իսկ ապրիլի 23-ին նախագահի ստորագրությամբ վիճահարույց օրենքն իրավական ուժ ստացավ։
Այսպիսով, ԱԺ անժամկետ ու անվերջանալի արտահերթ նիստ անելու առաջարկը, որ ժամանակի սվիններով էր ընդունվել Հայաստանի այսօրվա իշխանության կողմից, այսօր լուռ ու մունջ դարձավ օրենք։
