ԵՐԵՎԱՆ, 24 ապրիլի — Sputnik, Արմենուհի Մխոյան. Այսօր հիշատակի պատարագ է մատուցվել Շիրակի թեմի բոլոր եկեղեցիներում: Ապա` Հայոց ցեղասպանության հիշատակի միջոցառումները շարունակվեցին Ցեղասպանության զոհերի հիշատակը հավերժացնող «Վերածնունդ» հուշակոթողի մոտ, որի հեղինակը ՀՀ վաստակավոր, ՌԴ ժողովրդական նկարիչ, Ուկրաինական ԽՍՀ արվեստի վաստակավոր գործիչ Ֆրիդ Սողոյանն է։
Հուշակոթողին ծաղիկներ դրեցին ու 1 րոպե լռությամբ անմեղ զոհերի հիշատակը հարգեցին նաև Գյումրու կայազորի զինվորները, Գյումրիում տեղակայված 102-րդ ռազմաբազայի ու սահմանապահ ջոկատի հրամանատարներն ու սպայական անձնակազմը, ինչպես նաև Գյումրիում ՌԴ գլխավոր հյուպատոս Ալեքսանդր Կոպնինը:
Ավելի ուշ Շիրակի և Լոռու մարզերի բնակիչները, այս մարզերում գործող դիվանագիտական կառույցների, մարզային և քաղաքային իշխանությունների ներկայացուցիչները, ԱԺ պատգամավորները, զինվորականները հավաքվեցին Հերհերի ձորում, որն ավելի հայտնի է «Ջարդի ձոր» անվամբ:
«20-րդ դարասկզբի ողբերգությունից դասեր պետք է քաղել և ամեն ինչ անել, որ մեզ հետ այլևս նման ոճիր չիրագործվի: Իսկ մենք դա պետք է անենք հզոր հայրենիք կառուցելով: Մեր թշնամիների քթի տակ մենք պետք է ստեղծենք ուժեղ, կայուն, բարեկեցիկ պետություն, որտեղ կշարունակի ապրել, արարել, ստեղծագործել հայ մարդը»,– լրագրողների հետ զրույցում ասաց Շիրակի մարզպետ Տիգրան Պետրոսյանը։
Գյումրու քաղաքապետ Սամվել Բալասանյանն էլ պատմեց, որ իր նախնիները` մայրական կողմից Մուշից են, իսկ հայրական կողմից` Կարսից: «Պապս ծնողների ձեռքը բռնած փախել է: Ալեքպոլի որբանոցում ավելի ուշ նրան հաջողվում է գտնել քրոջն ու երկու եղբայրներին: Սա պատմություն է, որը մոռանալ հնարավոր չէ»,–ասաց Բալասանյանը:
Ամեն տարի Հերհերի ձոր են գալիս նաև նրանք, ում հարազատները զոհվել են հենց Հերհերի ձորում: Հովհաննես Սարգսյանը Հերհեր էր եկել իր հարազատների լուսանկարով. Սարիղամիշից գաղթած Գևորգն ու եղբայրը` Հուսիկը, 1920 թվականին փորձել են Ալեքպոլ մտած թուրքերից պաշտպանել համագյուղացիներին, սակայն թուրքերը, երկուսին կապելով ձիուց և բերելով Հերհերի ձոր, այրել են:
Ըստ պատմական որոշ վկայությունների` 1918-21 թվականներին այս տարածքում են նահատակվել Ալեքպոլ գավառի և Ղարաքիլիսայի 50 գյուղի ավելի քան 12 հազար բնակիչ: