ԵՐԵՎԱՆ, 25 ապրիլի — Sputnik. Հայաստանի դիվանագիտական ներկայացուցչությունների ու դեսպանատների ծախսերն այս տարի ավելացել են 347 522 400 դրամով կամ 714 300 դոլարով։ Այս մասին այսօր կառավարության նիստում հայտարարեց ՀՀ ԱԳ նախարար Զոհրաբ Մնացականյանը` նշելով, որ սրանք այն ծախսերն են, որոնք նախկինում չեն կատարվել և հետևաբար բյուջեում ներառված չեն եղել։ Բայց այժմ արդեն դրանք բյուջեում ավելացնելու անհրաժեշտություն է առաջացել։
«Նախկինում արտերկրում մի շարք ՀՀ դիվանագիտական ներկայացուցչությունների ղեկավարների պաշտոնում կատարվել են նշանակումներ, որոնք ԱԳՆ համակարգից չէին։ Նրանցից մի մասը հրաժարվել են աշխատավարձերից ու այլ ծախսերից։ Այսօր մենք պետականացնում ենք դիվանագիտական ծառայությունը, որը պետական ծառայություն է»,– ասաց նախարարը։
Նիկոլ Փաշինյանը շեշտեց, որ այս իրավիճակին ինքը նախկինում բախվել է պատգամավորական գործունեության ընթացքում տարեկան բյուջեի հաստատման ժամանակ։
«Եվ պետք է խոստովանել, որ դա բավական տարօրինակ իրավիճակ է։ Այնպիսի տպավորություն է, որ գոյություն են ունեցել սեփական դեսպանատներ։ Այսինքն` դեսպանատներ, որտեղ գույքն ու ամեն ինչը պատկանում է կոնկրետ մի մարդու, բայց նրանք հանդես են գալիս պետության անունից։ Սա շատ տարօրինակ է` անկախ նրանից, թե ով է դեսպանը։ Եվ բազմաթիվ հարցեր են ծագում, որոնց պատասխանները գտնելն այսօր օրակարգային է ՀՀ համար»,– ասաց վարչապետը։
Կառավարության նիստում անուններ ու փաստեր չնշվեցին, փոխարենը դրանց մասին ասված է ՀՀ կառավարության նիստում ներկայացված համապատասխան որոշման նախագծում։
Նախագծից պարզ է դառնում, որ խոսքը մասնավորապես Վատիկանում, Ժնևում և Լոնդոնում ՀՀ դիվանագիտական, Լիոնում և Լոս Անջելեսում ՀՀ գլխավոր հյուպատոսական ներկայացուցչությունների ղեկավարների մասին է, որոնք նախկինում իրենց առաջարկությամբ հրաժարվել են հասանելիք աշխատավարձերից, ընտանիքի անդամներին փոխհատուցման գումարներից, բնակարանների վարձավճարներից, բժշկական ապահովագրությունից և ներկայացուցչական այլ ծախսերից։
Իսկ Լոս Անջելեսում Հայաստանի գլխավոր հյուպատոսն իր վրա էր վերցրել նաև Գլխավոր հյուպատոսության անձնակազմի պարտադիր ապահովագրական ծախսերը։
