ԵՐԵՎԱՆ, 26 ապրիլի — Sputnik. Արդյոք Ազգային անվտանգության խնդիր տեսնում է ՀՀ պաշտպանության նախարարն այն հարցում, որ ՀՀ նախկին ՊՆ Միքայել Հարությունյանը նաև այլ երկրի քաղաքացի է, իսկ այս պահին` պարզ չէ որտեղ է գտնվում։ Այս մասին այսօր լրագրողները հետաքրքրվեցին ՀՀ ՊՆ Դավիթ Տոնոյանից, ճեպազրույցի ժամանակ։
«Իսկ դա օրենքով արգելվում է»,– հարցին հարցով պատասխանեց նախարարը։
Այնուամենայնիվ, լրագրողները փորձեցին ճշտել նրա վերաբերմունքն այս խնդրի վերաբերյալ։
«Իմ անձնական կարծիքով դա սխալ է, բայց ես ունեմ վարքի իմ կանոնները։ Ես անձամբ նորմալ չեմ համարում, որ ՀՀ պաշտպանության նախարարը կարող է լինել նաև այլ երկրի քաղաքացի, բայց օրենքը դա չի արգելում»,–ասաց Դավիթ Տոնոյանը։
Հիշեցնենք` ՀՀ պաշտպանության նախկին նախարար Միքայել Հարությունյանին մեղադրանք է առաջադրվել մարտի 1-ի գործով։ Նա մեղադրվում է սահմանադրական կարգը տապալելու համար։Հարությունյանի նկատմամբ հայտարարվել է հետախուզում։ Նա նաև ՌԴ քաղաքացի է։
