ԵՐԵՎԱՆ, 1 մայիսի — Sputnik. Դիլիջանում գործող «Բնապահպանի տուն» հասարակական կազմակերպությունը ծառագողության նոր հնարք է բացահայտել, որի մասին հայտնում է Facebook–ում։
Կազմակերպության անդամները «Դիլիջան» ազգայի պարկում կատարած դիտարկումների արդյունքում պարզել են, որ ծառագողերը նախապես այրում են իրենց ընտրած ծառերի բները` հետագայում դրանք կտրելու ու որպես թափուկ անտառից դուրս բերելու համար, որպեսզի, ինչպես կազմակերպությունն է նշում, «օրենքի հետ խնդիր չունենան»։
«Շատերի վրա նույնիսկ կացնով իրենց նշանն են դնում, որ մյուս գողերը ձեռք չտան»,– նշված է «Բնապահպանի տուն» ՀԿ–ի տարածած հայտարարության մեջ։
Կազմակերպությունը նաև հայտնում է, որ այս մասին տեղյակ է պահել պաշտոնատար անձանց, ու հիշեցնում, որ ազգային պարկի տնօրենը խոստացել է, որ անտառի թափուկները տրամադրվելու են բացառապես կարիքավոր ընտանիքներին ու դպրոցներին։
«Շատ չի անցնի, և անտառ կմտնեն միայն այն մարդիկ, որոնց համար ծառը սեփական տունը տաքացնելու միջոց է և ոչ թե տասնյակներով կտրել-ծախելու ու փող աշխատելու աղբյուր։ Եվ այդ ժամանակ ամեն ինչ տեղը կընկնի, և մենք էլ հանգիստ սրտերով կգնանք այստեղից»,– գրում են բնապահպանները` խոստանալով մինչ այդ գիշեր–ցերեկ ապահովել անտառի անվտանգությունը։
Այդ նպատակով կազմակերպության անդամները տեսանկարահանող սարքերով հերթապահում են անտառում ու առաջին իսկ հնարավորության դեպքում հրապարակելու են ծառագողերի լուսանկարներն ու տեսանյութերը համացանցում, որպեսզի ոչ ոք անպատիժ չմնա։