ԵՐԵՎԱՆ, 1 մայիսի — Sputnik. Հակառակորդի կրակոցից վիրավորված պայմանագրային զինծառայող Արգիշտի Սամվելի Սեփխանյանի վիրահատությունն անցել է բարեհաջող։ Facebook սոցիալական ցանցի իր էջում այս մասին գրել է ՀՀ ՊՆ մամուլի քարտուղար Արծրուն Հովհաննիսյանը։
«Նրա վիճակը կայուն է, դրական դինամիկայով»,– գրել է Հովհաննիսյանը։
Հիշեցնենք` զինծառայողը վիրավորվել էր ապրիլի 30-ին, ժամը 14:20-ի սահմանում Տավուշի զորամասերից մեկում, հակառակորդի կրակոցից։ Նա վնասվածք է ստացել գլխի շրջանում։
Սեփխանյանը Տավուշից ուղղաթիռով տեղափոխվել էր Երևանի զինվորական հոսպիտալ։
Դեպքի առթիվ քննչական կոմիտեում քրեական գործ է հարուցվել` ազգային, ռասայական կամ կրոնական ատելության կամ կրոնական մոլեռանդության շարժառիթով սպանության փաստով։
Արգիշտի Սեփխանյանը 32 տարեկան է, Լոռու մարզի Ախթալա համայնքից։ Համայնքի ղեկավար Արկադի Թամազյանը Sputnik Արմենիայի հետ զրույցում հայտնել էր, որ Արգիշտին տան ավագ որդին է, ամուսնացած չէ, ունի մեկ քույր և մեկ եղբայր։ Եղբայրը նույնպես պայմանագրային զինծառայող է։ Տղայի հայրը մահացած է, նա ապրում է մոր ու եղբոր հետ։ Քույրն ամուսնացած է։
