ԵՐԵՎԱՆ, 18 մայիսի – Sputnik. ՀՔԾ պետ Սասուն Խաչատրյանին իր մտերիմ շրջապատում հարցրել են, թե ինչու քրեական գործով անցնող նախկին պաշտոնատար անձանց ժամանակին չեն բռնում, որ հիմա էլ հետախուզում են ու չեն կարող հայտնաբերել կամ չեն կարողանում հետ վերադարձնել Հայաստան, նա խոստովանել է, որ համակարգում դեռ նախկին իշխանությունների հետ կապ ունեցող անձինք կան, որոնք էլ նման խնդրի առաջ են իրենց կանգնեցրել: Այս մասին գրում է «Ժողովուրդ» օրաթերթը։
«Ասել է թե` Սասուն Խաչատրյանը փորձել է բացատրել, որ համակարգից ինֆորմացիայի արտահոսք կա: Երբ արդեն կոնկրետ փաստեր ունենալով` որևէ նախկին պաշտոնյայի փորձում են բերման ենթարկել, քրեական գործով անցնող անձինք արդեն անհետացած են լինում»,- նշված է հոդվածում։
Օրաթերթը հիշատակում է մի քանի աղմկահարույց դեպք, երբ քրեական տարբեր գործերով որպես մեղադրյալներ կամ կասկածյալներ անցնող հայտնի պաշտոնյաներ հասցրին լքել երկիրը` անդրադառնալով ՀՀ բնապահպանության նախկին նախարար Արամ Հարությունյանի, ԴԱՀԿ նախկին պետ Միհրան Պողոսյանի, մարտի 1-ի գործով քննչական խմբի նախկին ղեկավար Վահագն Հարությունյանի, պաշտպանության նախկին նախարար Միքայել Հարությունյանի գործերին:
Թերթը փորձել է տեղեկությունը պարզել ՀՔԾ–ից` տեղեկության արտահոսք եղել է, թե ոչ։ Ի պատասխան հայտնել են, որ Սասուն Խաչատրյանն իր մտերիմ շրջապատում քրեական գործերից չի խոսում:
