ԵՐԵՎԱՆ, 5 հունիսի — Sputnik. Գեներալ-լեյտենանտ Մանվել Գրիգորյանը կտրուկ հրաժարվել է բուժումներից, այդ թվում և ինսուլինից, որը ստանում է մեծ չափաքանակով: Այս մասին «Հրապարակին» հայտնել է Գրիգորյանի բժիշկ Արտակ Մանուկյանը։
«Մանվել Գրիգորյանին իր կամքին հակառակ են տեղափոխել դատապարտյալների հիվանդանոց։ Նման հիվանդին պահելու, պատշաճ բուժօգնություն տրամադրելու հնարավորություն այդ հիվանդանոցը չունի, անգամ ավելի թեթև հիվանդությամբ տառապողներին են այդ հիվանդանոցից ուղղորդում քաղաքացիական հիվանդանոցներ»,–ասել է բժիշկը։
Հարցին, թե ինչ հետևանքներ կունենա Գրիգորյանի` բուժումներից հրաժարվելը, բժիշկը պատասխանել է, որ հնարավոր է` ընկնի կոմայի մեջ
Հիշեցնենք, որ երեկ Մանվել Գրիգորյանի պաշտպանները հանցագործության մասին հաղորդում են ներկայացրել ոստիկանություն` ասելով, որ նրան «Նաիրի» ԲԿ–ից իր կամքին հակառակ են տեղափոխել դատապարտյալների հիվանդանոց։
Երեկ Գրիգորյանի և նրա կնոջ` նույն գործով ամբաստանյալ Նազիկ Ամիրյանի դատական նիստն էր, որին Գրիգորյանը չէր մասնակցում` առողջական խնդիրների պատճառով։ Մեղադրյալի բացակայության պատճառով էլ դատարանը որոշեց հետաձգել նիստը։ Հաջորդ դատական նիստը կկայանա հունիսի 11–ին, ժամը 12–ին։
