ԵՐԵՎԱՆ, 6 հունիսի — Sputnik. «Նորավանք» գիտակրթական հիմնադրամը 16 438 879 դրամի պարտք ունի, որը կմարի Հայաստանի կառավարությունը։ Այդ մասին որոշումը կայացվեց գործադիրի այսօրվա նիստում։
Պարտքը գոյացել է 2019 թվականի հունվարի 1-ից հետո` աշխատակիցների աշխատավարձի, հարկերի, կոմունալ ծախսերի, կապի ծառայությունների չվճարման հետևանքով և ձևավորված տույժերի մասով։
Պարտքի վերաբերյալ տեղեկանքը կառավարությանն է ներկայացրել հիմնադրամի գործադիր տնօրենը։
Կառավարությունը որոշեց պետական բյուջեի միջոցներից հատկացնել 16 438 879 դրամ` հաշվի առնելով, որ «Նորավանք» գիտակրթական հիմնադրամի գործունեությունն իրականացվել է գերազանցապես ՀՀ պետական բյուջեի միջոցների հաշվին։
Նշենք, որ 2019 թվականի հունվարի 1-ից հիմնադրամի ֆինանսավորումը ՀՀ պետական բյուջեից դադարեցվել էր։ Մարտի 8-ին որոշվել էր լուծարել հիմնադրամը, բայց հոգաբարձուների խորհուրդը դիմել էր դատարան` բողոքարկելով կառավարության այդ որոշումը։ Այդ հիմքով որոշման կատարումը հետաձգվել է մինչ դատարանի վերջնական որոշման կայացումը։
Հիշեցնենք` «Նորավանք» գիտակրթական հիմնադրամը ստեղծվել էր ՀՀ կառավարության 2000 թվականի նոյեմբերի 20-ին։
