ԵՐԵՎԱՆ, 14 Հունիս — Sputnik. Առաջիկայում լուրջ կրճատումներ են սպասվում ոստիկանության համակարգում. որոշ մարզային վարչությունների պետերի և բաժնի պետերի փոփոխություններ կլինեն: Այս մասին գրում է «Փաստ» թերթը։
«Ըստ էության, սա արվում է ոստիկանության հանդեպ հասարակության վերաբերմունքն էլ ավելի բարձրացնելու և վստահությունը մեծացնելու համար»,–գրում է թերթը:
Տեղեկությունը ճշտելու համար թերթի թղթակիցը դիմել է ՀՀ ոստիկանության լրատվության եւ հասարակայնության հետ կապերի վարչության պետ Աշոտ Ահարոնյանին: Նրա խոսքով` ոստիկանությունում կադրային փոփոխություններ մշտապես են լինում, ինչի մասին հավուր պատշաճի տեղեկացվում է:
«Կրճատումներ, օպտիմալացման ծրագրեր ևս իրականացվում են ոստիկանությունում: Ես գնահատական չեմ կարող տալ և ասել, թե դրանք կտրուկ են, շատ են կամ քիչ, բայց, այո, օպտիմալացման գործընթաց ոստիկանությունում մեկնարկել է և այս պահին ընթացքի մեջ է»,-ասել է Ահարոնյանը։
Ըստ նրա` ոստիկանությունում օպտիմալացման գործընթացը շարունակական է լինելու:
Հիշեցնենք, որ օրերս ՀՀ ոստիկանապետ Վալերիյ Օսիպյանի հրամանով աշխատանքից ազատվել էր ՀՀ ճանապարհային ոստիկանության պետի տեղակալ, ոստիկանության գնդապետ Նիկողայոս Եղիազարյանը։