ԵՐԵՎԱՆ, 18 հունիսի — Sputnik. «Բարգավաճ Հայաստան» կուսակցության ղեկավար Գագիկ Ծառուկյանը Քննչական կոմիտեից ստացած ծանուցագրին պատասխանել է իր փաստաբանի միջոցով։ Այսօր Ազգային ժողովում նա այդ մասին ասաց լրագրողների հետ ճեպազրույցում։
Ավելի վաղ տեղեկացրել էինք, որ Ծառուկյանը պատռել էր ՔԿ–ի ծանուցագիրը:
«Ծանուցագիրը, որը ուղարկում են, այսինքն` պետք է դնեմ ռամկայի մեջ ու կախե՞մ պատին` Այվազովսկու նկարի կողքը։ Ծանոթագիրը ստացել եմ, ուրիշ ի՞նչ հարցեր կան։ Համապատասխան ես պատասխանել եմ իմ փաստաբանի միջոցով ու ասել, որ բոլորը հավասար են օրենքի առաջ»,–ասաց նա։
Հարցին, թե, այնուամենայնիվ, պատռե՞լ է ՔԿ–ի ծանուցագիրը` Ծառուկյանը պատասխանեց` ի՞նչ է, եթե առանց ծանուցագրի գնար ՔԿ, չէի՞ն ընդունելու։ «Մեր Սահմանադրության 96–րդ հոդվածի համաձայն` պատգամավորը ո՛չ հետապնդման, ո՛չ էլ պատասխանատվության է ենթարկվում։ Հարգելով օրենքը` իմ փաստաբանը իմ կարծիքն ուղարկել է Քննչական կոմիտե»,–ասաց նա։
Նրա խոսքով` հաշվի առնելով Սահմանադրության 96–րդ հոդվածը` ՔԿ–ի կողմից ծանուցագիր ուղարկելն անհարգալից վերաբերմունք էր իր հանդեպ։
Ի դեպ, ՀՀ Սահմանադրության 96–րդ հոդվածը սահմանում է պատգամավորների անձեռնմխելիությանն հարցը։ «Պատգամավորն իր լիազորությունների ժամկետում և դրանից հետո չի կարող հետապնդվել և պատասխանատվության ենթարկվել պատգամավորական գործունեության շրջանակներում հայտնած կարծիքի կամ քվեարկության համար: Պատգամավորի նկատմամբ քրեական հետապնդում կարող է հարուցվել միայն Ազգային ժողովի համաձայնությամբ»,–նշված է վերոհիշյալ հոդվածում։
Հիշեցնենք, որ Ծառուկյանին ՔԿ ներկայանալու ևս մի ծանուցում են ուղարկել։ ԲՀԿ առաջնորդին հարցաքննության են հրավիրում Աբովյան քաղաքում «Քաղաքացիական պայմանագիր» կուսակցության թեկնածուի ենթաշտաբներից մեկի պետի մեքենան հրկիզելու փաստի առթիվ հարուցված քրեական գործի նախաքննության շրջանակում: Քննչական կոմիտեի Կոտայքի մարզային քննչական վարչության Աբովյանի քննչական բաժնում քննություն է տարվում` պարզելու ուրիշի գույքը դիտավորյալ ոչնչացնելու կամ վնասելու դեպքի հանգամանքները:
2019 թվականի հունիսի 8-ին, ժամը 04-ի սահմանում անհայտ անձը հրկիզել է Աբովյան քաղաքի 46-ամյա բնակչին պատկանող բնակարանի դուռն ու «Նիսան Տիդա» մակնիշի ավտոմեքենան: Դեպքի առթիվ հարուցվել է քրեական գործ՝ քրեական օրենսգրքի 185-րդ հոդվածի 2-րդ մասի 1-ին կետով (Գույքը դիտավորությամբ ոչնչացնելը կամ վնասելը): 46-ամյա բնակիչը ճանաչվել է տուժող:
