ԵՐԵՎԱՆ, 18 հունիսի — Sputnik. Ազգային ժողովի «Իմ քայլը» խմբակցությունը նոր պատգամավոր ունի։ Այսօր` ԱԺ–ի հերթական նիստի ժամանակ, նախագահ Արարատ Միրզոյանը ներկայացրեց նոր պատգամավոր Արթուր Հովհաննիսյանին:
«ԿԸՀ-ն ներկայացրել է ԱԺ-ի պատգամավոր ընտրված և լիազորությունները վաղաժամկետ դադարեցրած պատգամավորի մանդատը հաջորդ թեկնածուին տրամադրելու մասին թիվ 3 արձանագրությունը, ըստ որի մանդատը տրվում է Իմ քայլը կուսակցությունների դաշինքի համապետական ընտրական ցուցակի հաջորդ թեկնածու Արթուր Հովհաննիսյանին»,- ասաց Միրզոյանը:
Հովհաննիսյանն օրենսդիրների և հանրության առաջ երդվեց բարեխղճորեն կատարել ժողովրդի առջև ունեցած պարտավորությունները, պահպանել ՀՀ Սահմանադրությունը և օրենքները, նպաստել ՀՀ շահերի պաշտպանությանը։
Նշենք, որ Հովհաննիսյանը փոխարինում է «Իի քայլի» արդեն իսկ նախկին պատգամավոր Նարինե Թուխիկյանին (Խաչատուրյան)։
Թուխիկյանը մայիսի 31–ին հրաժարվել էր պատգամավորական մանդատից և հունիսի 11–ին նշանակվել Կրթության, գիտության, մշակույթի, երիտասարդության և սպորտի փոխնախարար:
