ԵՐԵՎԱՆ, 18 հունիսի — Sputnik. ՀՀ երկրորդ նախագահ Ռոբերտ Քոչարյանի և մյուսների գործով ՀՀ վերաքննիչ քրեական դատարանում ընթացող այսօրվա դատական նիստը հետաձգվեց։ Այս մասին հայտնեց գործով դատավոր Արմեն Դանիելյանը։
«Հաշվի առնելով այն հանգամանքը, որ դատախազությունը Քոչարյանի գործով ցանկանում է ամբողջությամբ ներկայացնել իր դիրքորոշումը, իսկ այսօր աշխատանքային օրվա ավարտին 15 րոպե է մնացել, ուստի նիստը պետք է հետաձգվի։ Դատական հաջորդ նիստը տեղի կունենա հունիսի 19–ին, ժամը 9։15–ին»,–ասաց դատավորը։
Հիշեցնենք` այսօրվա դատական նիստի ժամանակ քննվում էր Քոչարյանի պաշտպանների, Սեյրան Օհանյանի պաշտպանների, ինչպես նաև տուժող Արթուր Ավագյանի ներկայացուցիչ Սեդա Սաֆարյանի կողմից դատավոր Արմեն Դանիելյանի ինքնաբացարկի միջնորդությունները։
Ավելի վաղ հայտնել էինք, նիստին ներկա չէր Ռոբերտ Քոչարյանը։ Պաշտպան Հայկ Ալումյանը հայտնել էր, քրգործի ծավալն այնպիսին է, որ Քոչարյանի հերթն այսօր մինչև ժամը 18։00–ն հազիվ հասներ` ելույթ ունենալու առումով, այդ իսկ պատճառով էլ նա նախընտրել է այսօր դատական նիստին չներկայանալ։
Դատական նիստն ընթացավ բավականին լարված մթնոլորտում։ Դատավորն անգամ 10 րոպե ընդմիջում հայտարարեց` կրքերը հանդարտվելու համար։
Հիշեցնենք` Երևանի ընդհանուր իրավասությունների Ավան և Նոր Նորք վարչական շրջանների դատարանը՝ դատավոր Դավիթ Գրիգորյանի նախագահությամբ, մարտի 18-ին որոշեց Քոչարյանին անձնական երաշխավորությամբ ազատ արձակել։
Մայիսի 20–ին ՀՀ երկրորդ նախագահ Ռոբերտ Քոչարյանի, ՀՀ նախկին փոխվարչապետ Արմեն Գևորգյանի, Պաշտպանության նախկին նախարար Սեյրան Օհանյանի և ՀԱՊԿ նախկին գլխավոր քարտուղար Յուրի Խաչատուրովի վերաբերյալ գործի վարույթը դատարանի որոշմամբ կասեցվեց և ուղարկվեց ՍԴ:
Գլխավոր դատախազությունը բողոքարկեց մայիսի 18-ի՝ Երևան քաղաքի ընդհանուր իրավասության դատարանի՝ ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորման որոշումը փոփոխելու և նույն դատարանի մայիսի 20–ի՝ քրեական գործի վարույթը կասեցնելու և Սահմանադրական դատարան դիմելու որոշումը:
