ԵՐԵՎԱՆ, 20 հունիսի — Sputnik. Հայաստանում ավտոմեքենաների ներկրումն աճում է, աճում է նաև արտահանումը, բայց արտահանման աճը հարկ եղածի չափ չի ֆիքսվում։ Այսօր Ազգային ժողովում 2018 թվականի պետբյուջեի կատարման հաշվետվության քննարկման ժամանակ այս մասին ասաց վարչապետ Նիկոլ Փաշինյանը։
Նրա խոսքով` արտահանման զգալի մասը վիճակագրությամբ չի արձանագրվում։ Օրինակ` ավտոմեքենաների արտահանումը։ Հունվար–ապրիլին ավտոմեքենաների ներմուծումն աճել է 24%–ով կամ 255 մլն դոլարով։ Բայց արտահանումը, պաշտոնական վիճակագրության համաձայն, չի աճել։
«Այն դեպքում, երբ մենք ձեզ հետ գիտենք, որ ներմուծվող տրանսպորտային միջոցների զգալի մասը հետագայում արտահանվում է։ Արտահանումը տեղի է ունենում ամենահեշտ եղանակով. մարդիկ (հիմնականում ԵԱՏՄ մյուս երկրներից քաղաքացիներ – խմբ.) գալիս են, մեքենա են գնում և հետ գնում», – ասաց վարչապետը։
Նրա խոսքով` ավտոմեքենաների արտահանումը փաստորեն արտահանման կոնկրետ հոդված է, որը վիճակագրության մեջ արտացոլված չէ։ Վարչապետը կարծում է, որ Ազգային վիճակագրական ծառայությունը պետք է ուսումնասիրի իրավիճակը և ավելի լիարժեք պատկերը ներկայացնի։
Երևանի ծայրամասում սփռված է ավտոմեքենաների հսկայական գերեզմանոցը. ֆոտոշարք
