ԵՐԵՎԱՆ, 19 հուլիսի — Sputnik. Բարձրագույն դատական խորհրդի (ԲԴԽ) անդամ Նախշուն Տավարացյանը կշարունակի իր գործունեությունը։ Նման որոշում կայացրեց այսօր ԲԴԽ–ն` մերժելով խորհրդի անդամների` Նախշուն Տավարացյանի լիազորությունների դադարեցման պահանջով ներկայացրած դիմումը։
Նշենք, որ պահանջը ներկայացրել էին Բարձրագույն դատական խորհրդի անդամներ Գրիգոր Բեքմեզյանը, Հայկ Հովհաննիսյանն ու Լիպարիտ Մելիքջանյանը։
Նրանք իրենց պահանջը հիմնավորում էին` ասելով, որ Վճռաբեկ դատարանի դատավոր Նախշուն Տավարացյանը, որը ԲԴԽ անդամ էր ընտրվել 2018–ի նոյեմբերի 8-ին, սակայն երդվել է 2019–ի հուլիսի 15-ին, չէր մասնակցել 2019–ի ընթացքում տեղի ունեցած ԲԴԽ 2-ից ավելի նիստին։ Տավարացյանը նաև նիստերից բացակայելու հարգելի պատճառներ չէր ներկայացրել, ինչպես նաև չէր հայտնել իր մասնակցությունը բացառող հանգամանքների մասին։
Հիշեցնեք, որ Տավարացյանը հուլիսի 11-ին դատավորների ընդհանուր ժողովում երդվեց որպես ԲԴԽ անդամ:
