ԵՐԵՎԱՆ, 12 սեպտեմբերի - Sputnik. ՀՀ փոխվարչապետ Տիգրան Ավինյանը կարծում է, որ Հավաքական անվտանգության մասին պայմանագիրի (ՀԱՊԿ) անդամ երկրների՝ բարձր տեխնոլոգիաների ոլորտում աշխատող ձեռնարկությունների համագործակցության մակարդակն անբավարար է։
«Անդամ երկրների ռազմատնտեսական համագործակցության ընդլայնման համատեքստում ամենաարդիական թեմաներից է համագործակցությունը բարձր տեխնոլոգիաների ոլորտում», – ասաց Ավինյանը` բացելով ՀԱՊԿ Ռազմատնտեսական համագործակցության միջպետական հանձնաժողովի նիստը։
Ավինյանի խոսքով` բարձր տեխնոլոգիաների ոլորտում համագործակցության ակտիվացումը կարող է լրացուցիչ ու բավականին ծանրակշիռ գործիք դառնալ ՀԱՊԿ անդամ երկրների համագործակցության խորացման համար։
Քեռյան․ «Չենք կարող ռազմաքաղաքական առումով գտնվել ՀԱՊԿ–ում, տնտեսական մասով գործակցել ԵՄ-ի հետ»
«Ապագայում այս ուղղությամբ ավելի լայն մոտեցումներ մշակելուց բացի սկզբի համար առաջարկում ենք ակտիվացնել համատեղ աշխատանքը արդեն գոյություն ունեցող զարգացման ծրագրերի շրջանակում այնպիսի ուղղություններով, ինչպիսիք են ավտոմեքենաշինությունը, հաջորդ սերնդի ցանցերը, աերոտիեզերական իրերն ու համակարգերը, միկրոէլեկտրոնիկան ու ռադիոէլեկտրոնիկան, կապի մասնագիտացված համակարգեր, իրերի արդյունաբերական համացանց, արհեստական բանականություն»,-նշեց ՀՀ փոխվարչապետը։
Նա ավելացրեց, որ հայկական կողմը պատրաստ է ավելի հանգամանորեն ուսումնասիրել այդ ուղղություններն ու կարծում է, որ միջպետական հանձնաժողովը հենց այն հարթակն է, որտեղ կարելի է նման կարևոր հարցեր քննարկել։
ԱԺ–ն քննարկում է ՀԱՊԿ տեղեկատվական անվտանգության համաձայնագիրը. ի՞նչ կապ ունի Բաքուն
Նշենք, որ ՀԱՊԿ Ռազմատնտեսական համագործակցության միջպետական հանձնաժողովի նիստը վարում է ՌԴ փոխվարչապետ Յուրի Բորիսովը։ Հանձնաժողովի աշխատանքին Ռուսաստանի կողմից մասնակցում են նաև ՀԱՊԿ գլխավոր քարտուղարի ժ/պ Վալերի Սեմերիկովը, Հայաստանում Ռուսաստանի դեսպան Սերգեյ Կոպիրկինը։
