ԵՐԵՎԱՆ, 28 Հոկտեմբեր — Sputnik. ՀՀ ԱԺ նախկին նախագահ Արա Բաբլոյանին կրկին հրավիրել են Հատուկ քննչական ծառայություն։ Այս մասին հաղորդում է «Փաստինֆո» կայքը։
Ներս մտնելուց առաջ Արա Բաբլոյանը լրագրողներին ասաց, որ չգիտի` հարցաքննության համար են կանչել, թե այլ բանի։
«Փաստինֆոյի» տեղեկություններով` նախատեսվում է, որ Արա Բաբլոյանին այսօր մեղադրանք կառաջադրվի։
Հիշեցնենք, որ Բաբլոյանը ՀՀ հատուկ քննչական ծառայությունում քննվող քրեական գործով որպես կասկածյալ է ներգրավվել` իշխանությունը յուրացնելու կասկածանքով։
Ըստ առաջադրված մեղադրանքի` 2018–ի մարտի 1-ի դրությամբ, երբ 2015–ի դեկտեմբերի 6-ի փոփոխություններով Սահմանադրության 7-րդ գլխի ուժի մեջ մտնելուն մնացել էր շուրջ 40 օր, մի խումբ պաշտոնատար անձինք այդ պաշտոնում իրենց թիմակցին մինչև 70 տարին լրանալը պաշտոնավարելու հնարավորություն ընձեռելու նպատակով, Սահմանադրությամբ նախատեսված կարգի խախտմամբ, զավթել են իշխանությունը՝ Հրայր Թովմասյանին 2018–ի մարտի 21-ին նշանակելով ՍԴ նախագահ։
«ՀՔԾ–ում բոլոր հարցերին հստակ պատասխանել եմ». Արա Բաբլոյանին մեղադրանք չի առաջադրվել
Քանի որ ՍԴ–ի այն ժամանակվա նախագահ Գագիկ Հարությունյանի պաշտոնավորման ժամկետը (70 տարին) լրանալու էր 2018 թվականի մարտի 23-ին, նա 2018 թվականի մարտի 21-ով ՀՀ ԱԺ նախագահ Արա Բաբլոյանին հասցեագրված ՍԴ նախագահի պաշտոնից հրաժարվելու դիմում է ստորագրել։
Արա Բաբլոյանին մեղադրանք չէր առաջադրվել։
