ԵՐԵՎԱՆ, 12 նոյեմբերի — Sputnik. Ուսումնասիրելով Արսեն Բաբայանի նկատմամբ քրեական գործի նյութերը և նկատի ունենալով, որ նախաքննության ներկա փուլում արդեն իսկ կատարվել է նրան առնչվող անհրաժեշտ քննչական և դատավարական գործողությունների հիմնական մասը` ՀՀ հատուկ քննչական ծառայությունը դիտարկում է Արսեն Բաբայանի նկատմամբ կիրառված կալանքը անձնական երաշխավորությամբ փոխարինելու հնարավորությունը։ Այս մասին Facebook-ում հայտնում է ՀՀ Գլխավոր դատախազի խորհրդական Գոռ Աբրահամյանը։
«Նվազել է վերջինիս ազատության մեջ գտնվելու դեպքում քրեական դատավարությանը մասնակցող անձանց վրա անօրինական ազդեցություն գործադրելու ճանապարհով գործի քննությանը խոչընդոտելու վտանգը»,– ասված է ՀՔԾ գրությունից մեջբերված հատվածում։
Ի դեպ, նշվում է նաև, որ անձնական երաշխավորությամբ հանդես են եկել «Հայաստանի Հելսինկյան կոմիտեի» նախագահ Ավետիք Իշխանյանն ու ԱԺ «Իմ քայլը» խմբակցության պատգամավոր Սիսակ Գաբրիելյանը։
Նրանք ներկայացրել են երաշխավորման մասին դիմումներ և որպես երաշխիքի գումար` 500.000-ական ՀՀ դրամ փոխանցելու վերաբերյալ անդորրագրերի պատճեները։
Այսօր` 2019 թվականի նոյեմբերի 12-ին, որոշում է կայացվել մեղադրյալ Արսեն Բաբայանի նկատմամբ կիրառված խափանման միջոց կալանավորումը փոփոխելու և նրա նկատմամբ որպես խափանման միջոց անձնական երաշխավորությունը կիրառելու վերաբերյալ:
Որոշումն ուղարկվել է քրեակատարողական հիմնարկ`դրա կատարումն ապահովելու նպատակով:
Հավելենք, որ քիչ առաջ Արսեն Բաբայանն ազատ արձակվեց «Վարդաշեն» ՔԿՀ–ից։ Նա արդեն 22 օր է` անազատության մեջ է։
Հիշեցնենք` ԱԺ աշխատակազմի ղեկավարի նախկին տեղակալը ձերբակալվել է հոկտեմբերի 21-ի երեկոյան` պաշտոնեական կեղծիք կատարելու կասկածանքով։ Ավելի ուշ նրան մեկ այլ մեղադրանք է առաջադրվել ՀՀ քրեական օրենսգրքի 300-րդ հոդվածի 1-ին մասով (իշխանությունը յուրացնելուն օժանդակել)։ Հոկտեմբերի 24-ին Բաբայանը կալանավորվել է։ Հատուկ քննչական ծառայության պաշտոնական հիմնավորման համաձայն` պաշտոնական անձինք, որոնց թվում է նաև Բաբայանը, ՀՀ սահմանադրական դատարանի նախկին նախագահ Գագիկ Հարությունյանի` լիազորությունները վայր դնելու գործընթացում կատարել են պաշտոնեական կեղծիքներ։
Հայրապետյան. «Իրավական վերջին զարգացումները ՍԴ-ի դեմ սկսված օպերացիայի մասնիկներն են»
Ըստ ՀՔԾ հաղորդագրության` Հարությունյանի` ՍԴ նախագահի պաշտոնից հրաժարվելու մասին դիմումը ՍԴ աշխատակազմի ընդհանուր բաժնից ելքագրվել և աշխատակազմի ղեկավարի միջոցով ԱԺ աշխատակազմի ղեկավարի տեղակալի պաշտոնակատար Արսեն Բաբայանին է հանձնվել 2018–ի մարտի 5-ին, մինչդեռ ԱԺ նախագահ Արա Բաբլոյանը, պաշտոնապես ստացած չլինելով Գագիկ Հարությունյանի հիշյալ դիմումը, 2018 թ. մարտի 2-ին ապօրինի ստորագրել և հանդես է եկել ՍԴ նախագահի հրաժարականի դիմում ներկայացնելու մասին հայտարարությամբ:
