ԵՐԵՎԱՆ, 30 նոյեմբերի – Sputnik. Բավրայի մաքսակետի նախկին պետ, «ջակուզի փարթիի» հայտնի հերոս Երեմ Մարգարյանը շահել է ՊԵԿ-ի դեմ դատը։ Այս մասին գրում է «Հրապարակ» օրաթերթը։
«ՊԵԿ-ը ստիպված է լինելու Մարգարյանին վճարել 2017-ից չվճարած աշխատավարձն ամբողջությամբ»,– նշում է պարբերականը:
Թերթը հիշեցնում է 2017 թ․ մայիսին դատախազության տարածած հաղորդագրությունը, ըստ որի` կաշառակերության կասկածանքով ձերբակալվել է Բավրայի մաքսակետի պետ Երեմ Մարգարյանը:
«Նա շուրջ 2 տարի է՝ դատական ատյաններում վիճարկում է առաջադրված մեղադրանքը, բայց մինչ օրս ազատված չէ պաշտոնից՝ լիազորությունները դադարեցված են, քանի դեռ չկա դատարանի ուժի մեջ մտած որոշում։ Նա, օրենքով սահմանված կարգով, պետք է ամեն ամիս աշխատավարձ ստանար, ինչը ՊԵԿ-ը չէր անում»,– նշված է հոդվածում։
Փաշինյանի գաղտնի որոշման արդյունքում ՊԵԿ նախագահի պարգևավճարը նվազել է
Ըստ «Հրապարակի»` Մարգարյանին ՊԵԿ-ից ասել էին, թե աշխատավարձը պահպանվում է, բայց դա չի նշանակում, որ պետք է վճարեն։
«Հայցը բավարարվել է անցած ամիս, և ՊԵԿ-ն այժմ ստիպված է փոխանցել ողջ գումարը»,– նշում է թերթը:
Ավելի վաղ պարբերականը գրել էր, որ տարիներ առաջ մաքսավորների համար սեմինար է կազմակերպել, որին մասնակցել է նաև Մարգարյանը։ Նա հյուրանոցում «ջակուզի փարթի» է կազմակերպել ու մոռացել է փակել ջուրը, ինչի հետևանքով «Ալրաղացի Լյովի» (ԱԺ նախկին պատգամավոր Լևոն Սարգսյան) շքեղ օբյեկտում ջրհեղեղ է սկսվել։ Ջակուզիում զվարճացածների հետ հաշվեհարդար տեսնելու համար դեպքի վայր են եկել «Ալրաղացի Լյովիկի» մարտիկները։
