ԵՐԵՎԱՆ, 4 դեկտեմբերի – Sputnik. Դեկտեմբերի 5-ին Հայաստանը կգտնվի Սկանդինավիայից եկող ցուրտ մթնոլորտային ճակատի ազդեցության գոտում։ Այս մասին Facebook–ի իր էջում գրել է ՀՀ ԱԻՆ «Հիդրոմետ» ծառայության պետ Գագիկ Սուրենյանը, հավելելով, որ պրոցեսը սկզբում բավականին ուժեղ էր, հանրապետության տարածքում պետք է առաջացներ ձյան առատ տեղումներ, սակայն Հայաստան գալու ճանապարհին աստիճանաբար քայքայվել է։
«Առաջիկա գիշերվանից սկսած և վաղը ցերեկվա ընթացքում շրջանների մեծ մասում սպասվում են թույլ տեղումներ։ Բացառություն կկազմեն Գեղարքունիքը, Սյունիքը և Արցախը, որտեղ կանխատեսվում է առատ ձյուն, առանձին հատվածներում բուք, ճանապարհներին մերկասառույց։ Դեկտեմբերի 6-ից տեղումները կդադարեն և մինչև դեկտեմբերի 10-ը հանրապետության ողջ տարածքում սպասվում է առանց տեղումների եղանակ»,–գրել է Սուրենյանը։
Նշենք, որ այս գրառման հետ գրեթե միաժամանակ, Սուրենյանն իր էջում տեսանյութ էր հրապարակել, որում երևում էր, թե ինչպես է թութակը հետևում նրա կանխատեսումներին։
Սուրենյանի ձանձրույթը ցրվե՞լ է. օդի ջերմաստիճանը կտրուկ կփոխվի
«Մի աղջիկ է ուղարկել, ասում է` ամեն օր ուշադիր Ձեզ է նայում»,– տեսանյութին կից գրել է Սուրենյանը։
Էջի հետևորդներին զվարճացրել է տեսանյութը։ «Տանից թռնելու համար հարմար եղանակի է սպասում», «սա եղանակի տեսություն էլ կհաղորդի», «խոսել չգիտի, բայց ուշադիր լսում է»,–գրել են նրանք։
Նշենք, որ ՀՀ ԱԻՆ «Հիդրոմետ» ծառայության պետը շատ ակտիվ է սոցցանցային տիրույթում, և նրա ցանկացած գրառում մեծ արձագանք է ստանում օգտատերերի կողմից։
