ԵՐԵՎԱՆ, 4 դեկտեմբերի — Sputnik. «Թավշյա հեղափոխությունից» հետո Հայաստանում հարուցվել է 126 քրեական գործ` դպրոցների տնօրենների թույլ տված չարաշահումների փաստերով։ Այսօր ԱԺ ամբիոնից հայտարարեց ՀՀ վարչապետ Նիկոլ Փաշինյանը։
«Ավելի քան 200 անձինք 126 դպրոցների տնօրենների կողմից ձևակերպված են եղել որպես աշխատող, բայց իրականում եղել են նրանց ընտանիքի անդամներ` կին, ամուսին, եղբայր, ծնող, հորեղբոր տղա, զավակ և չեն գնացել աշխատանքի, բայց աշխատավարձ են ստացել։ 126 տնօրեն, որոնց մենք վստահել ենք մեր երեխաների կրթությունը, երեխաներից գողացել են, հայրենիքից գողացել են»,– ասաց նա։
Փաշինյանը նշեց, որ սա դեռ սկիզբն է։ «Եթե ասվում է, որ 126 քրեական գործ է հարուցվել, նշանակում է դեռ էլի պիտի հարուցվեն»,– ասաց վարչապետը։
Միաժամանակ, Փաշինյանը հիշեցրեց, որ հանրակրթական ոլորտում աշխատավարձը 10 տոկոսով բարձրացել է, ինչը նշանակում է, որ բարձրացել է նաև այն մարդկանց աշխատավարձը, ովքեր կոռուպցիոն եղանակներով այդ գումարները գրպանում են։
Վարդանը 48 տարվա լուսանկարները հավաքել ու Զովասարի խարխլված դպրոցը թանգարանի է վերածել
«Եվ երբ ասում ենք` աշխատավարձի բարձրացումը քիչ է, քիչ է նաև այն պատճառով, որ այդ բարձրացած աշխատավարձը չի բաժանվում միայն այն մարդկանց միջև, ովքեր իրոք ծառայում են հանրակրթությանը»,– ասաց Փաշինյանը։
Վարչապետը նշեց, որ դպրոցների տնօրենների աշխատավարձերը բարձրացնելով` պետությունը պետք է հասկանա, որ բարձրացնում է նաև դեռևս «չմաքրված» դպրոցների տնօրենների ամուսինների, ընտանիքի անդամների, սիրեկանների ու սիրուհիների աշխատավարձերը, որոնց գրանցել են դպրոցում։ Իսկ սա, նրա համոզմամբ, անընդունելի է։
Դպրոցի տնօրենից մինչև պահակ աշխատանքի չեն գնացել ու աշխատավարձ են ստացել. բացահայտումներ
