ԵՐԵՎԱՆ, 13 դեկտեմբերի – Sputnik. Գյումրեցի գործարար Գարիկ Ուզունյանը՝ «Շեկոն», կալանավորվել է: Նրան մեղադրանք է առաջադրվել ՀՀ ՔՕ 258 հոդվածի 258 հոդվածի 3-րդ մասի 1-ին կետով (խուլիգանություն, որը կատարվել է մի խումբ անձանց կամ կազմակերպված խմբի կողմից) և նույն հոդվածի 3-րդ մասի 5-րդ կետերով (խուլիգանություն, որը զուգորդվել է բացառիկ ցինիզմով): Sputnik Արմենիային այս մասին ասաց Շիրակի մարզի դատախազ Կարեն Գաբրիելյանը:
Նույն գործի շրջանակում մեղադրանք է առաջադրվել նաև որպես կասկածյալ ներգրավված և ձերբակալված երկրորդ անձին՝ Զոհրաբ Եսիմսեյտովին:
Նրան մեղադրանք է առաջադրվել ՀՀ ՔՕ 258 հոդվածի 3-րդ մասի 1-ին կետի հատկանիշերով (խուլիգանություն, որը կատարվել է մի խումբ անձանց կամ կազմակերպված խմբի կողմից): Նրա վերաբերյալ միջնորդություն է ներկայացվել դատարան:
«Շեկոն», ըստ հարուցված քրեական գործի, մեղադրվում է ԱԺ պատգամավոր Կարեն Սարուխանյանի ընկերոջը Գյումրիում ծեծելու համար:
«Խուլիգանություն չի եղել, եղել է անձնական խոսակցություն». Գյումրիում գրանցված դեպքի մասին
Հիշեցնենք` ՀՀ ԱԺ պատգամավոր Կարեն Սարուխանյանը դեկտեմբերի 9-ին Facebook-ի իր էջում գրել էր, որ Գյումրիում երկու հոգի խփել են իր ընկերոջը և սպառնացել, որ հաջորդը ինքն է լինելու։ Կատարվածի վերաբերյալ ոստիկանությունը հաղորդում էր ստացել, պարզվել էր միջադեպի մասնակից անձանց ինքնությունը։ «Շեկո» մականունով 30-ամյա տղամարդը` Գարիկ Ուզունյանը, որը Գյումրու բնակիչ է, հայտնաբերվել և ժամը 22-ի սահմաններում բերման էր ենթարկվել։ Մինչ այդ Սարուխանյանը գրառում էր արել և քննադատել Ռոբերտ Քոչարյանի կողմնակիցներին` ծաղկեպսակ դնելու համար, ապա ծավալված իրադարձությունները կապել իր գրառման հետ։
Զոհրաբ Եսիմսեյտովը նույնպես ձերբակալվել էր դեկտեմբերի 9-ին։
