ԵՐԵՎԱՆ, 21 հունվարի — Sputnik. Արարատի մարզպետ Գարիկ Սարգսյանը մարզպետարանում հավաքված անասնաբույծներին հայտնեց, որ սպանդանոցների շուրջ բարձրացած աղմուկը կհանգուցալուծվի վաղը` հունվարի 22-ին։
«Վաղը ԱԺ–ում կառավարության հետ հարցուպատասխանի ժամանակ «Իմ քայլը» խմբակցության պատգամավորները հարցը կբարձրացնեն, և կառավարությունը, ամենայն հավանականությամբ վարչապետը այդ հարցի պատասխանը կտա»,– ասաց նա։
Հանդիպմանը ներկա ԱԺ պատգամավոր Ռուստամ Բաքոյանը հայտնեց, որ խմբակցությունը մտադիր է փոփոխությունների առաջարկ ներկայացնել կառավարությանը։
«Տարածքի հեռավորություն կա, ծնի ժամանակ, անասունի վնասման ժամանակ երբեմն անասունին մորթելու անհրաժեշտություն է առաջանում, և չեն հասցնում տանել սպանդանոց։ Սպանդանոցում էլ, ասում եք, բազմաթիվ խնդիրներ կան` սկսած կշեռքից մինչև սանիտարահիգիենիկ պայմաններ»,– ասաց նա։
Բաքոյանը նշեց, որ բացի սպանդանոցների տերերից ու անասնապահներից այս խնդրում շահագրգռություն ունեն նաև միջնորդ վերավաճառողները։
Նրա խոսքով` առաջարկվող լուծումը չպիտի շրջանցի նաև նրանց։
«Սպանդանոցային մորթն այլընտրանք չունի». Գեորգի Ավետիսյան
«Մեր երկրում 500 միջնորդ մսավաճառ կա, որոնք մեր երկրի քաղաքացիներ են ու չպիտի զրկվեն իրենց աշխատանքից»,– ասաց նա։
Իշխանական ուժի ներկայացուցիչն դրա համար առաջարկում է դիտարկել շրջիկ սպանդանոցների ինստիտուտը։
«Ժողովրդական լեզվով ասած` ղասաբները, պետք է հնարավորություն ունենան շրջիկ սպանդանոցներ ունենալու, որով կարող են շրջել գյուղերում ու իրենց գործն անել։ Բայց սպանդանոցները մեր երկրում անհրաժեշտություն են»,– ասաց նա։
Անասնաբույծներն էլ իրենց առաջարկն արեցին` թույլ տալ խոշոր ընկերություններին իրենց տարածքում հիմնել մինի–սպանդանոցներ` բոլոր չափանիշները պահպանելով, ու դրանցում իրականացնել իրենց անասունների մորթը։
ՄԻՊ–ը կզբաղվի անասնաբույծների բարձրացրած խնդիրներով
Հիշեցնենք` ս.թ. հունվարի 15-ից ուժի մեջ է մտել կառավարության ընդունած որոշումը, որի համաձայն` ՀՀ ողջ տարածքում վաճառվող միսը պետք է ունենա սպանդանոցում մորթված լինելը հավաստող փաստաթուղթ, ինչն անվտանգության երաշխիք է։
Հունվարի 15-ին որոշման դեմ բողոքող ֆերմերները հայտարարում էին, որ սպանդանոցները մորթի դիմաց չափազանց մեծ գին են պահանջում, բացի այդ, շատ տեղերում դրանք ընդհանրապես բացակայում են, և անասուն մորթելու համար ֆերմերը ստիպված է լինում տասնյակ կիլոմետրեր անցնել։