ԵՐԵՎԱՆ, 30 հունվարի — Sputnik. Սահմանադրական դատարանի նախագահ Հրայր Թովմասյանի պաշտպաններն այժմ աշխատում են ՀՀ վարչապետ Նիկոլ Փաշինյանի դեմ հայցադիմում պատրաստելու վրա։ Sputnik Արմենիային այս լուրը հայտնեց Թովմասյանի պաշտպան Ամրամ Մակինյանը` ասելով, որ Փաշինյանի դեմ հայց ներկայացնելու որոշումն օրեր առաջ է կայացվել։
«Այժմ հայցադիմումի վրա ենք աշխատում, շատ շուտով պատրաստ կլինի այն։ Հստակ ժամկետ չեմ կարող ասել, բայց կարճ ժամկետում կավարտենք հայցադիմումն ու դատարան կներկայացնենք»,–ասաց Մակինյանը։
Հարցին, թե ի՞նչ հիմքով են Փաշինյանի դեմ հայց ներկայացնելու դատարան` պաշտպանը պատասխանեց, որ Փաշինյանի հայտարարություն է հիմք լինելու։
Ճշգրտմանը` խոսքը մե՞կ հայտարարության մասին է, թե՞ հայտարարությունների` Մակինյանն արձագանքեց, որ հայցադիմումի հիմքի և առարկայի մասին մանրամասներն ավելի ուշ կհայտնեն։
«Ոչինչ չենք թաքցնելու, հանրությանն առաջիկայում կներկայացնենք հայցադիմումը»,–ասաց նա։
Հիշեցնենք` հունվարի 25-ին Կապանում կազմակերպված ասուլիսի ժամանակ ՀՀ վարչապետ Նիկոլ Փաշինյանը խոսեց Սահմանադրական դատարանի նախագահ Հրայր Թովմասյանի մասին և ասաց, որ 2018թ.–ի մայիսից նա իր ծառայություններն է առաջարկել վարչապետին։
Թովմասյանն արձագանքեց վարչապետի հայտարարությանը՝ սպառնալով զրպարտության համար դատի տալ, եթե Փաշինյանը 20 օրվա ընթացքում ապացույցներ չներկայացնի կամ չհերքի ասածը: Փաշինյանը խոստացավ շատ շուտով ապացույցներ հրապարակել և խնդրեց, որ իրեն չմեղադրեն անհամաչափ ուժեղ հակահարված տալու համար:
Հաջորդ օրը վարչապետը հրապարակեց գրիչի լուսանկարը` նշելով, որ գրենական պիտույքը Հրայր Թովմասյանինն է և իր մոտ է հայտնվել 2018թ–ի մայիսին «Հայաստան» համահայկական հիմնադրամի հոգաբարձուների խորհրդի նիստի ժամանակ։ Ըստ Փաշինյանի` ՍԴ նախագահը գրիչը տվել է ու հրաժարվել այն հետ վերցնել։
Նշենք, որ Հրայր Թովմասյանը փաստաբաններին խնդրել էր հայցադիմում պատրաստել Փաշինյանի դեմ։
Հրայր Թովմասյանը խոսում է, Նիկոլ Փաշինյանը` ժպտում. «անհերքելի ապացույց» գրիչի տեսանյութը
