ԵՐԵՎԱՆ, 26 փետրվարի — Sputnik. Վրաստանի հսկիչ մարմինները Հայաստանից արտահանվող կոնյակի սպիրտի լաբորատոր ստուգումներ են անցկացնում։
Նշենք, որ խոսքը ոչ թե շշալցված կոնյակի, այլ կոնյակի սպիրտով լի ցիստեռների մասին է։ Սակայն փորձագետների խոսքով` շուտով կարող են նաև պատրաստի կոնյակի զանգվածային ստուգումներ սկսվել։ Ստուգումներ են անցկացվում նույնիսկ այն դեպքերում, երբ այդ սպիրտը Վրաստանում չի վաճառվում, այլ Ռուսաստան և Բելառուս է արտահանվում։
Sputnik Արմենիայի հետ զրույցում այս տեղեկությունը հաստատեց Պռոշյանի կոնյակի գործարանի արտաքին տնտեսական գծով փոխտնօրեն Ավետիք Գասպարյանը։
«Հասկանալի կլիներ, եթե այդ սպիրտը Վրաստանում վաճառեինք։ Բայց մենք պարզապես ապրանքը Վրաստանով երրորդ երկրներ ենք տանում»,–նշեց նա։
Նրա խոսքով` արդեն մի քանի ամիս է` նման ստուգումներ են իրականացվում, դա մեկ–երկու օրով (երբեմն` ավելի շատ) ուշացնում է բեռների առաքումը։
Խմել կոնյակ, որի «անցած ճանապարհին» լիովին տիրապետում ես, կամ մի տակառագործի պատմություն
Նշենք` գինու և կոնյակի (այդ թվում` կոնյակի սպիրտի) ստուգման համար ածխածնի ու ջրածնի իզոտոպներն են վերլուծում։ Հայաստանի Սննդամթերքի անվտանգության տեսչական մարմինը դրա համար հատուկ սարքավորումներ ունի։
Այնուամենայնիվ, բոլորը չէ, որ պատվիրում են այդ փորձաքննությունը։ Այն 120 հազար դրամ արժե։ Այդքան էլ թանկ չէ, եթե հաշվի առնենք, որ 20 ֆուտանոց կոնտեյների մեջ ավելի քան 10 տոննա կոնյակ է տեղավորվում (համեմատության համար բավարար է պատկերացնել` ինչ արժե այդ բեռը)։ Եթե արտադրողներն ունենային այդ ստուգման եզրակացությունը, նրանց համար ավելի հեշտ կլիներ մուտք գործել Վրաստան. պետությունը նրանց մեջքին կանգնած կլիներ։ Բայց կոնյակի գործարանները չեն ուզում վճարել, իսկ արդյունքում մաքսատանը կանգնած` միևնույնն է` գումար են կորցնում։
Սննդամթերքի անվտանգության տեսչական մարմինն իր պատասխան Sputnik Արմենիայի հարցմանն ասաց, որ վրացի գործընկերներից հայկական ապօրինի սպիրտի ներմուծման մասին ահազանգ չեն ստացել։
«Վրաստանում Հայաստանի դեսպանատունն արդեն ծանոթ է հարցին ու քննարկումներ է անցկացնում Վրաստանի համապատասխան մարմինների հետ»,–նշեցին տեսչությունում։
Հայաստանի կոնյակի մի քանի գործարաններ ոչ միայն պատրաստի կոնյակ, այլև կոնյակի սպիրտ են արտահանում։ Այն արտասահմանում է շշալցվում (այդպես է բելառուս գործընկերների հետ աշխատում, օրինակ, գործարար ու պատգամավոր Գագիկ Ծառուկյանին պատկանող գործարանը)։
2017 թվականին սպիրտը Հայաստանից կոնյակի արտադրանքի արտահանման ընդհանուր ծավալի մոտ մեկ քառորդն էր կազմում (50 միլիոն դոլար)։ 2017 թվականից հետո պաշտոնական վիճակագրությունը հրապարակում է միայն կոնյակի արտահանման ընդհանուր ծավալը` չնշելով սպիրտի ու շշալցված կոնյակի չափաբաժինները։ Վերջին տարիներին Հայաստանը մոտ 200 միլիոն դոլարի կոնյակ է արտահանում։
Դեղ, թե կոնյակ` կեղծիքն անթույլատրելի է. Ռուսաստանում և Հայաստանում պայքար են սկսել
