ԵՐԵՎԱՆ, 28 փետրվարի — Sputnik. Վրաստանի հետ սահմանը փակելու հարցն այս պահին չի քննարկվում: Լրագրողների հետ զրույցում այս մասին հայտնեց Անվտանգության խորհրդի քարտուղար Արմեն Գրիգորյանը` անդրադառնալով կորոնավիրուսի տարածման կանխարգելման ուղղությամբ տարված աշխատանքներին։
«Փոխվարչապետ Տիգրան Ավինյանի գլխավորությամբ աշխատանքային խումբ է ստեղծվել, որը կապի մեջ է հարևան երկրների առողջապահության պատասխանատու մարմինների հետ։ Այսինքն` մշտական կապի մեջ ենք բոլորի հետ, և վարակի տարածման վտանգի դեպքում համապատասխան որոշումներ կկայացնենք»,–ասաց Գրիգորյանը։
Նրա խոսքով` մինչ այս կորոնավիրուսի տարածման կանխարգելման համար բոլոր ձեռնարկված աշխատանքներն արդյունավետ են եղել, դատելով այն բանից, որ մինչ այս պահը հաջողվել է կանխել դրա մուտքը ՀՀ։
Հիշեցնենք, որ փետրվարի 23–ին որոշում կայացվեց հայ–իրանական սահմանը երկու շաբաթով փակել` կորոնավիրուսի տարածման կանխարգելման նպատակով։
Չինաստանի առողջապահության պետական կոմիտեն հայտնում է, որ նոր COVID-2019 տեսակի կորոնավիրուսով վարակվածների մոտ 46%–ը Չինաստանում ապաքինվել ու դուրս են գրվել հիվանդանոցից։ Վերջին տվյալների համաձայն` վարակվածների թիվը Չինաստանում 78 824–ի է հասել, նրանցից 36 117 (45,8%) մարդ ապաքինվել են։ Այս պահին 39 919 մարդ դեռ հիվանդանոցում են։
Հիվանդությունը Չինաստանում ընդհանուր առմամբ 2788 մարդու կյանք է խլել։
Նշենք նաև, որ վարակը վաղուց արդեն դուրս է եկել Չինաստանի սահմաններից ու տարածվել աշխարհի մի շարք երկրներում, այդ թվում` մեր հարևան Իրանում ու Վրաստանում։
