ԵՐԵՎԱՆ, 4 մարտի — Sputnik. ՀՀ երկրորդ նախագահ Ռոբերտ Քոչարյանի փաստաբան Արամ Օրբելյանը դատի է տվել ՀՀ Ազգային անվտանգության ծառայությանը և Հայաստանի Հանրային հեռուստաընկերությանը: Օրբելյանի ներկայացուցիչ Նարինե Բեգլարյանը Sputnik Արմենիայի հետ զրույցում նշեց` խնդիրն այն է, որ 2020թ.–ի հունվարի 30-ին Հ1-ի լուրերի թողարկման ընթացքում Արամ Օրբելյանի վերաբերյալ ներկայացվել են իրականությանը չհամապատասխանող փաստացի տվյալներ։
«Ռեպորտաժում նշվել է, թե Օրբելյանը 2019թ.–ի մայիսից օգոստոս ամիսներին պարբերաբար կարգի խախտմամբ ելումուտ է ունեցել Սահմանադրական դատարան: Նորությունը ներկայացրել են պնդումով, որ դա ԱԱԾ–ից ստացված տեղեկատվություն է»,–ասաց Բեգլարյանը։
Նրա խոսքով` եթեր հեռարձակված ռեպորտաժից հետո Օրբելյանը դիմել է ԱԱԾ և Հանրային հեռուստաընկերություն, որպեսզի իրեն տրամադրեն նյութերը, թե որտեղից են ստացել այդ տեղեկատվությունը։ Սակայն երկու կառույցից էլ, ըստ պաշտպանի, բովանդակային պատասխան չեն ստացել, դրա համար էլ դիմել են դատարան։
Հրայր Թովմասյանը դատի է տվել Նիկոլ Փաշինյանին
Օրբելյանը պահանջում է հերքել զրպարտություն հանդիսացող տվյալները և փոխհատուցել զրպարտությամբ պատճառված վնասը` 2 մլն դրամ։
Հայցը մակագրվել է Երևան քաղաքի ընդհանուր իրավասության դատարանի դատավոր Նաիրա Ավետիսյանին:
