ԵՐԵՎԱՆ, 10 մարտի — Sputnik. Երևանի ՋԷԿ–ում ամեն ամիս աշխատավարձից շատ պարգևավճարներ են ստացել։ Նման բացահայտում է արել ՀՀ հաշվեքննիչ պալատը` ՋԷԿ–ի 2017–18թթ–ի ֆինանսական գործունեությունն ուսումնասիրելու արդյունքում։ ՀՊ ներկայացուցիչն այսօր ԱԺ–ի Ֆինանսավարկային և բյուջետային հարցերի մշտական հանձնաժողովի նիստում ներկայացրեց ուսումնասիրության արդյունքները։
«2017-2018թթ–ի ընկերության աշխատակիցների աշխատանքային պայմանագրերով ֆիքսված աշխատավարձերի ֆոնդը կազմել է 115 600 600 դրամ։ Իսկ պարգևավճարների ընդհանուր գումարը կազմել է կրկնակիից շատ` 122 798 800 դրամ։ Մինչդեռ ընկերության կանոնադրությամբ պարգևավճարը չի կարող գերազանցել հիմնական աշխատավարձի 4-45 տոկոսը»,– ասաց նա։
Հանձնաժողովի նախագահ Մանե Թանդիլյանը հարց ուղղեց նիստին ներկա ՀՀ տարածքային կառավարման և ենթակառուցվածքների նախարարի տեղակալ Հակոբ Վարդանյանին։
«Երբ նայում ես թվերին, հասկանում ես, որ պարգևատրումներն աշխատավարձի կրկնակիին են հավասար եղել։ Ինչպե՞ս է ստացվում, որ պարգևատրումներն ավելի շատ են, քան դրույքաչափով նախատեսված գումարները»,– հարցրեց նա։
Փոխնախարար Երևանի ՋԷԿ–ում ստեղծված ֆինանսական իրադրությունն «անփութության հետևանք» որակեց։
«Նկատի ունեմ, որ հաստիքացուցակում ինչ–որ գումարներ են դրված եղել, ինչը ղեկավարությանը ճկունություն և հնարավորություն չի տվել ճիշտ գնահատելու իրենց աշխատակիցներին` ավելի հին ու ավելի փորձառու աշխատողներին ավելի շատ վճարել, ավելի ոչ փորձառուին` ավելի պակաս»,– ասաց նա։
Վարդանյանը հայտնեց, որ Երևանի ՋԵԿ–ն այս առումով բացառություն չէ։ Նախարարության ենթակայության տակ գտնվող բոլոր ընկերություններում պարգևավճարների նույն սկզբունքն է գործում։
«Այն պահից սկսած, երբ ես սկսել եմ աշխատել նախարարությունում, նախարարության ենթակայության տակ գտնվող բոլոր ընկերություններում, չեմ կարող ասել` ինչու, բայց գործել է այդ սկզբունքը. դե ֆակտո ստացած աշխատավարձի մի մասը, գուցե և 50 տոկոսից ավելին, տրվել է որպես պարգևատրում»,– նշեց Վարդանյանը։
Նա նաև հայտնեց, որ որոշ ընկերություններում նախարարության միջամտության արդյունքում այս աշխատաոճն արդեն վերացվել է, ֆիքսվել է հստակ աշխատավարձ, ու հույս հայտնեց, որ ապագայում նման փոփոխություն կկատարվի նաև Երևանի ՋԷԿ–ում։
Աշխատավարձերը, սակայն, ՋԵԿ–ում ՀՊ–ի բացահայտած միակ ինքնիրավչությունը չէ։
Ինչպես է Ավշարի դպրոցի հին շենքը List.am-ում վաճառքի հանվել. մարզպետը մանրամասներ հայտնեց
Պարզվել է նաև, որ ընկերության ղեկավարությունն իրեն սպասարկող ծառայողական ավտոմեքենաների համար պետական գումարով թանկարժեք պետհամարանիշներ է գնել։
444QQ04 և 444DD04 համարանիշների դիմաց ՋԵԿ–ի բյուջեից 2017թ–ին 1 224 000 դրամ է վճարվել` յուրաքանչյուրի համար` 612 000 դրամ։
Այս խնդրին, փոխնախարար Վարդանյանի խոսքով, նախարարությունը չի անդրադարձել։
ՀՀ հաշվեքննիչ պալատի անդամ Գագիկ Ոսկանյանը, սակայն, արձագանքեց, որ պետական համարանիշ ստանալու համար ընկերությունը պետք է նախարարությունից թույլտվություն ունենար։
Ի պատասխան փոխնախարարը խոստացավ պարզել, թե ինչ հիմքով են այդ գնումները կատարվել, իսկ իրավապահների` անարդյունավետ ծախսի վերաբերյալ համապատասխան եզրակացությունից հետո, ըստ նրա, նախարարությունը հանդես կգա գումարը վերականգնելու պահանջով։
Կեղծ մեդալների գործով մեղադրանք է առաջադրվել ԱԺ պաշտոնյայի
«Երևանի ՋԷԿ»–ը ՀՀ տարածքային կառավարման և ենթակառուցվածքների նախարարության հաշվեկշռում գործող փակ բաժնետիրական ընկերություն է։ Հիմնադրվել է 1963 թվականին: 1997 թվականին վերաձևակերպվել է «Երևանի ջերմաէլեկտրակենտրոն» պետական փակ բաժնետիրական ընկերության:
2008թ.–ին կորեական «GS Engineering & Construction Corp.», «Mitsui & Co., LTD» և «TEPSCO» ընկերությունները ստանձնել են ՋԷԿ–ի նոր էներգաբլոկի կառուցման աշխատանքները։
2010թ. ապրիլի 21-ին նոր էներգաբլոկը շահագործման է հանձնվել, իսկ հին էներգաբլոկը հանվել է շահագործումից։
Որոշել են, որ Պողոսն է բաժակը բերելու. պետգնումներում կոռուպցիոն սխեման եղել է ու կա
