ԵՐԵՎԱՆ, 12 մարտի – Sputnik. ՀՀ պաշտպանության նախարար Դավիթ Տոնոյանի հրամանով Շուշան Ստեփանյանը նշանակվել է ՀՀ ՊՆ մամուլի քարտուղար: Տեղեկությունը հայտնում է նախարարության մամուլի ծառայությունը։
Շուշան Ստեփանյանը մայոր է։ Ծնվել է 08.08.1988թ., Արցախի Հանրապետության Հադրութ քաղաքում։1995-2005թթ. սովորել և գերազանցությամբ ավարտել է ք. Հադրութի Մ.Մանվելյանի անվան միջնակարգ դպրոցը, 2005-2009 թթ. սովորել է ԵՊՀ ժուռնալիստիկայի ֆակուլտետում, որն ավարտել է գերազանց առաջադիմությամբ։
2007-2009 թթ. աշխատել է «Հետք» էլեկտրոնային պարբերականում` որպես հետաքննող լրագրող, 2009թ. ընդունվել է պայմանագրային զինվորական ծառայության՝ որպես ՀՀ ՊՆ «Հայ զինվոր» թերթի ռազմաքաղաքական տեղեկատվության և զինծառայողների գաղափարախոսական բաժանմունքի թղթակից, 2013 թ. նույն թերթի խմբագրության մշակույթի և հասարակայնության կապերի բաժանմունքի թղթակից, 2015-2016 թթ. նույն թերթի խմբագրության զորքերի առօրյա գործունեության լուսաբանման բաժնի խմբագիր, 2017 թ. նույն թերթի խմբագրության զորքերի առօրյա գործունեության լուսաբանման բաժնի պետ, 2018 թ. «Զինուժ Մեդիա» պետական հիմնարկի մամուլի բաժնի թղթակից։
2019 թ-ից ծառայում է ՀՀ զինված ուժերում, 2009 թ. թիմի կազմում ճանաչվել է European Journalism Centre-ի կողմից կազմակերպված հետաքննական լրագրության ուսումնական մրցույթի հաղթող և վերապատրաստվել Նիդեռլանդներում։
2014 թ–ին վերապատրաստվել է ԳԴՀ ԶՈւ Ինֆորմացիայի և կոմունիկացիայի ակադեմիայում։ Պարգևատրվել է «ՀՀ ԶՈւ 20 տարի», «Ծ.Հ.Ս. Իսակով», «Անբասիր ծառայության համար» 1-ին աստիճանի, «Մարշալ Բաղրամյան» մեդալներով, պատվոգրերով:
Հայրը` Շահեն Ստեփանյանը, ղարաբաղյան պատերազմի ակտիվ մասնակից է, հետմահու պարգևատրվել է Արցախի Հանրապետության «Մարտական խաչ» 2-րդ աստիճանի շքանշանով։
Նշենք, որ ՊՆ մամուլի քարտուղարի պաշտոնը լքելու որոշման մասին Արծրուն Հովհաննիսյանը հայտնել էր մարտի 6-ին` Facebook–ում գրելով, որ ծառայության 23 տարիների ընթացքում երազել է զբաղվել ռազմական կրթությամբ: Տեղեկություններ կային, որ նրան կփոխարինի արտակարգ իրավիճակների նախարարի նախկին խոսնակ Նանա Գնդոյանը։
Կորոնավիրուսի պատճառով չեղարկվել է առաջին գործուղումը. Բադասյանը Փարիզ չի մեկնի
