ԵՐԵՎԱՆ, 21 մարտի - Sputnik. ՀՀ էկոնոմիկայի նախարարության մամուլի ծառայությունը տեղեկացնում է, որ Հայաստանի Հանրապետության և Իրանի Իսլամական Հանրապետության միջև բեռնաշրջանառության բացառությունների ցանկն ընդլայնվել է:
«Մարդասիրական օգնության շրջանակում փոխադրվող լրացուցիչ ապրանքների և դրանց փոխադրման ընթացակարգի սահմանման անհրաժեշտությամբ պայմանավորված՝ կառավարության 2020 թվականի փետրվարի 24-ի որոշման մեջ հերթական փոփոխություններն են արվել, որոնցով թույլատրվում է երկու երկրների միջև տնտեսական նշանակություն ունեցող ապրանքների փոխադրումը»,- նշված է պաշտոնական հաղորդագրության մեջ:
Ցանկում նշված ապրանքների մի մասի փոխադրումը թույլատրում է Պետական եկամուտների կոմիտեն՝ հիմք ընդունելով առողջապահության նախարարության` փոխադրման ենթակա ապրանքատեսակների և դրանց չափաքանակների վերաբերյալ գրավոր համաձայնությունը։ Այդ ցանկում են խմորիչները, ծխախոտն ու ծխախոտի արդյունաբերական փոխարինիչները, դիզելային վառելիքը և այլն։
Ցանկում ներառված մնացած ապրանքների փոխադրումը թույլատրվում է՝ հաշվի առնելով «Մեղրի» անցակետի բացթողումային հնարավորությունները, ինչպես նաև փոխադրվող ապրանքատեսակների չափաքանակներն ու առանձնահատկությունները։
Հաղորդագրության մեջ նաև նշված են ապրանքների փոխադրման եղանակները։
«Փոխաբեռնման ենթակա ապրանքները փոխաբեռնվում են կամ Մեղրիի անցումային կետի տարածքում կամ «Ագարակ Տերմինալ ՍՊԸ» մաքսային հսկողության տարածքում»,- նշված է հաղորդագրության մեջ։
Ցանկը` https://www.gov.am/am/news/item/14160/
Հավելենք, որ փոխաբեռնման ոչ ենթակա ապրանքների ՀՀ տարածքով տեղաշարժը և բեռնաթափումից հետո տրանսպորտային միջոցի վերադարձն Իրան համակարգում և հսկում է ՀՀ ոստիկանությունը՝ հաշվի առնելով ՀՀ առողջապահության նախարարության ցուցումներն ու առաջարկությունները։
Կորոնավիրուսն ընդդեմ երևանյան տրանսպորտի. վարակը նաև վարորդի գրպանին է հարվածել
Հիշեցնենք, որ մարտի 19-ին ՀՀ փոխվարչապետ, արտակարգ դրության պարետ Տիգրան Ավինյանի որոշմամբ ժամանակավորապես սահմանափակել մի շարք բժշկական արտադրատեսակների արտահանումը Հայաստանի Հանրապետությունից նաև դեպի ԵԱՏՄ երկրներ։ Այդպիսի բժշկական արտադրատեսակների ցանկում են շնչառական, նաև բժշկական տարատեսակ դիմակներ, պաշտպանիչ ակնոցներ, քիմիական պաշտպանության մեկանգամյա օգտագործման արտահագուստ, առանձնահատուկ ամրության բախիլներ, վիրակապեր, բամբակ, թանզիֆ, բժշկական տարատեսակ ձեռնոցներ, շնչառական սարքավորում, Էթիլային սպիրտ, ախտորոշիչ թեստեր և այլն։
Երևանի մետրոյում մարդիկ քչացել են․ ինչպե՞ս են կորոնավիրուսի դեմ պայքարում «գետնի տակ»
