ԵՐԵՎԱն, 1 ապրիլի – Sputnik. Հայաստանի և Իսրայելի մասնագետների միջև կկազմակերպվի կորոնավիրուսի համավարակի հաղթահարման թեմայով տեսաժողով: ՀՀ նախագահ Արմեն Սարգսյանի մամուլի ծառայությունից հայտնում են, որ նման պայմանավորվածություն է ձեռք բերվել նախագահ Սարգսյանի և Իսրայելի առողջապահության նախարարության միջազգային հարաբերությունների վարչության տնօրեն, COVID 19 հարցերով Իսրայելի համակարգող, դոկտոր Աշեր Շալմոնի հեռախոսազրույցի ընթացքում:
«Դոկտոր Շալմոնը մանրամասն ներկայացրել է կորոնավիրուսի համավարակի հաղթահարման ուղղությամբ Իսրայելում ձեռնարկված քայլերը։ Զրույցի ընթացքում քննարկվել է Իսրայելի կողմից Հայաստանին հնարավոր օգնության ցուցաբերման հարցը, հստակեցվել են Հայաստանի կարիքները»,–նշված է հաղորդագրության մեջ։
Սարգսյանը և դոկտոր Շալմոնը պայմանավորվել են, որ առաջիկա օրերին Հայաստանի և Իսրայելի մասնագետների միջև կկազմակերպվի տեսաժողով՝ համագործակցության կոնկրետ ուղղությունների հստակեցման և գործնական քայլերի ձեռնարկման նպատակով։
Հիշեցնենք, որ օրեր առաջ Հայաստանի և Իսրայելի նախագահների հեռախոսազրույցից հետո նախագահ Սարգսյանի նախաձեռնությամբ զրույց էր տեղի ունեցել նաև ՀՀ առողջապահության նախարար Արսեն Թորոսյանի և COVID 19 հարցերով Իսրայելի համակարգող, դոկտոր Աշեր Շալմոնի միջև: Նրանք ներկայացրել էին կորոնավիրուսի դեմ պայքարի՝ երկու երկրների փորձը և պայմանավորվել շարունակել մասնագիտական շփումները: Կորոնավիրուսի դեմ պայքարի Իսրայելի փորձը կարող է օգտակար լինել Հայաստանի համար:
Հայաստանում այսօրվա դրությամբ կորոնավիրուսով վարակվածների թիվը 571–ի է հասել, իսկ Իսրայելում կորոնավիրուս է հայտնաբերվել 5591 մարդու մոտ:
Ռուսաստանում կորոնավիրուսը բուժող դեղորայք են ստեղծել. սպասում են մասնագետների պատասխանին