ԵՐԵՎԱՆ, 14 ապրիլի – Sputnik. ՀՀ կառավարությունն այսօր հաստատել է կորոնավիրուսի տնտեսական հետևանքների չեզոքացման տասներկուերորդ միջոցառումը, որը վերաբերում է սոցիալական խնդիրների առջև կանգնած մի խումբ անձանց։
«Միջոցառման շահառու են բնական գազի մատակարարման և էլեկտրական էներգիայի մատակարարման պայմանագիր կնքած այն բնակիչ բաժանորդները, որոնց 2020 թվականի փետրվար ամսվա ծախսը կազմել է բնական գազի սպառման գծով 10 հազար 1 դրամից մինչև 30 հազար դրամ, էլեկտրաէներգիայի սպառման գծով 5 հազար 1 դրամից մինչև 10 հազար դրամ»,– նշված է որոշման մեջ։
Աջակցությունը տրամադրվելու է յուրաքանչյուր բաժանորդի կողմից 2020 թվականի փետրվար ամսվա ընթացքում սպառված համապատասխանաբար բնական գազի և էլեկտրաէներգիայի դիմաց վճարի 30 տոկոսի չափով։
Գումարը կփոխանցվի բնական գազ և էլեկտրաէներգիա մատակարարող ընկերություններին միջոցառման շահառու հանդիսացող բնակիչներին հետագա փոխանցման պայմանով։ Պարտքի առկայության դեպքում այդ գումարը կուղղվի բաժանորդի պարտքի մարմանը, իսկ դրա բացակայության դեպքում կձևակերպվի որպես կանխավճար։
Հանրային ծառայությունները կարգավորող հանձնաժողովը մինչև 2020 թվականի ապրիլի 17-ը պետք է կազմակերպի միջոցառման իրականացումը:
Նպաստառուների դեպքում գործում են աջակցության այլ ձևեր. Բաթոյան
Ավելի վաղ կառավարությունը որոշել էր, որ աջակցություն կտա բնական գազի մատակարարման և էլեկտրական էներգիայի մատակարարման պայմանագիր կնքած այն բնակիչ բաժանորդներին, որոնց 2020 թվականի փետրվար ամսվա ծախսը չի գերազանցել բնական գազի սպառման գծով 10 000 դրամը, իսկ էլեկտրական էներգիայի սպառման գծով` 5 000 դրամը:
Քիչ գումար` շատերին. Բաթոյանն ասաց` ինչպես են մարդիկ աջակցություն ստանալու պետությունից
