20:26 06 հուլիսի 2020
Ուղիղ եթեր
  • USD484.35
  • GBP605.49
  • EUR547.07
  • RUB6.74
Հայաստան
Ստանալ կարճ հղումը
53310

Եսայանների ու Խաչատրյանների պայքարը շարունակվում է: Արդարադատության նախարարության իրավաբանական անձանց պետական ռեգիստրի գործակալությունը կասեցրել է «Ucom» ընկերության նորընտիր տնօրենի գրանցումը և կողմերին հրավիրել լսումների:

ԵՐԵՎԱՆ, 18 ապրիլի – Sputnik. «Ucom» փակ բաժնետիրական ընկերության նոր գլխավոր տնօրենի պետական գրանցումը հետաձգվում է 20 օրով: Նման որոշում է կայացրել ՀՀ արդարադատության նախարարության իրավաբանական անձանց պետական ռեգիստրի գործակալությունը:

Նոր տնօրենի գրանցման հարցով հարուցվել է վարչական վարույթ, որի ընթացքում կազմակերպվող լսումներից հետո միայն հայտնի կդառնա՝ Արա Խաչատրյանը կգրանցվի որպես գլխավոր տնօրեն, թե ոչ:

Խնդիրն այն է, որ գործակալության պետի պաշտոնակատար Տաթև Մկրտչյանն ապրիլի 16-ին միանգամից երկու դիմում է ստացել: Մեկը՝ Արա Խաչատրյանից, որտեղ կցված է եղել նաև տնօրենների խորհրդի նիստի` ապրիլի 14-ի որոշումը՝ իրեն ընկերության գլխավոր տնօրեն ընտրելու մասին: Մյուսը՝ «Ucom»-ի բաժնետեր, տնօրենների խորհրդի անդամ Ալեքսանդր Եսայանից, որը հայտնել է, թե ապրիլի 14-ին կայացած նիստն անցել է բազմաթիվ խախտումներով:

Եսայանը պետռեգիստրի գործակալությանը հայտնել է նաև, որ հիշյալ նիստը հրավիրվել է «Ucom»-ի տնօրենների խորհրդի անդամ Գուրգեն Գագիկի Խաչատրյանի նախաձեռնությամբ:

Երկու դիմումների ուսումնասիրության արդյունքում ՀՀ արդարադատության նախարարության իրավաբանական անձանց պետական ռեգիստրի գործակալությունը որոշում է կայացրել ապրիլի 21-ին, ժամը 17:20-ին լսումներ անցկացնել, որոնց մասնակցելու հրավերներ են ուղարկվել նաև դիմումներ ներկայացրած անձանց՝ նորընտիր տնօրեն Արա Խաչատրյանին, տնօրենների խորհրդի անդամ Ալեքսանդր Եսայանին ու նաև վերջինի եղբորը՝ ընկերության գործադիր մարմնի ներկայիս ղեկավար Հայկ Եսայանին:

Հիշեցնենք` օրեր առաջ լուրեր տարածվեցին, որ «Ucom»-ի շուրջ 800 աշխատակիցներ աշխատանքից դուրս գալու դիմումներ են գրել: Ապրիլի 14-ին ընկերության հիմնադիրներ և 5,94%-ի բաժնետերեր Եսայան եղբայրները հայտարարեցին, որ մյուս սեփականատերերին ավելի քան 34 մլրդ դրամ են առաջարկել մնացած բաժնետոմսերը ձեռք բերելու համար, որպեսզի կարողանան որոշիչ ձայն ունենալ բաժնետերերի որոշումներում:

Մեկ օր անց՝ ապրիլի 15-ին, սակայն, հայտարարվեց, որ ընկերության տնօրենների խորհրդի նիստի ժամանակ ընկերության գլխավոր տնօրեն է նշանակվել Արա Սերգեյի Խաչատրյանը:

Նշենք, որ Արա Խաչատրյանը եղել է «Գալաքսի ընկերությունների խմբի» գլխավոր ֆինանսական տնօրենը։ Ավելին, նա Առողջապահության նախկին փոխնախարար, նախարարության ենթակայության Հոգեկան առողջության պահպանման ազգային կենտրոնի (Նուբարաշենի հոգեբուժական կենտրոն) տնօրեն Սերգեյ Խաչատրյանի որդին է։ Սերգեյ Խաչատրյանը առողջապահության փոխնախարար էր։ Արա Խաչատրյանը նաև կոմպոզիտոր Ռոբերտ Ամիրխանյանի թոռն է:

Իսկ Գուրգեն Խաչատրյանը, որը նախաձեռնել է տնօրենների խորհրդի նիստը՝ Արա Խաչատրյանի ընտրության նպատակով, ՀՀ ՊԵԿ նախկին նախագահ, ֆինանսների նախկին նախարար Գագիկ Խաչատրյանի որդին է:

Մամուլին հասած տեղեկություններով` նա տարբեր անձանց միջոցով կանխիկ գումարներ է փոխանցել արտերկրում գտնվող օֆշորային ընկերությունների հաշվեհամարներին, ապա այդ գումարները «լվանալուց» հետո արդեն օրինական ճանապարհով փոխանցել Հայաստան՝ ներկայացվելով որպես «Ucom» ընկերության ներդրում:

Ըստ լուրերի` այս փաստերը հայտնվել են ԱԱԾ-ի ձեռքում, որոնց հիման վրա Գուրգեն Խաչատրյանին մեղադրանք է առաջադրվել ՀՀ քրեական օրենսգրքի 190-րդ հոդվածի հատկանիշներով՝ փողերի լվացումը, կոնվերտացումը:

Գուրգեն Խաչատրյանի փաստաբանական թիմը, սակայն, հերքել էր իրենց պաշտպանյալին նման մեղադրանք առաջադրելու մասին լուրը:

թեգերը:
Տնօրեն, UCom ընկերությունը, Հայաստան

Գլխավոր թեմաներ