ԵՐԵՎԱՆ, 11 մայիսի — Sputnik. ՀՀ ՄԻՊ Արման Թաթոյանն այսօր պատգամավորների հարցերին պատասխանելիս անդրադարձավ նաև ԱԺ—փոխնախագահ Ալեն Սիմոնյանի նկատմամբ «Լուսավոր Հայաստան» խմբակցության ղեկավար Էդմոն Մարուքյանի հնչեցրած սեռական բնույթի հայհոյանքին ու դրան հետևած միջադեպին, երբ «Ադեկվադ» միաբանության համահիմնադիր Արթուր Դանիելյանը հայհոյել էր Սիմոնյանին, վերջին էլ գլխով հարվածել էր նրա քթին:
«Իմ քայլը» խմբակցության անդամ Արթուր Հովհաննիսյանը հարց ուղղեց Արման Թաթոյանին, թե ինչպես է ստացվում, որ ԱԺ –ում Էդմոն Մարուքյանի հնչեցրած հայհոյանքին ՄԻՊ-ը որևէ կերպ չի արձագանքում, իսկ հետո տարածած հաղորդագրության մեջ արդեն նշվում է «կնոջ՝ սեռի հիմքով պայմանավորված վիրավորանք»:
«Խնդրում եմ պատասխանեք՝ սա պատահականությո՞ւն է, օրինաչափությո՞ւն է, թե՞ թերացում է, պարոն Թաթոյան»,- հարցրեց պատգամավորը:
«Ո՛չ պատահականություն է, ո՛չ օրինաչափություն է, ո՛չ էլ թերացում է,- պատասխանեց պաշտպանը,- դա աշխատանքի է՝ օբյեկտիվ, քանի որ խոսքը վերաբերում է կնոջը հատկապես՝ հենց սեռը թիրախավորելով վիրավորանք հասցնելուն: Ինչ վերաբերում է դրանից առաջ երկու պատգամավորների՝ իրար վիրավորանք հասցնելուն, այդ դեպքում իմ հայտարարությունը կունենար քաղաքական հենք և նշանակություն: Հետևաբար, ես ճիշտ եմ արել, որ հայտարարություն չեմ տարածել»:
Քաղաքացու իրավունքները ոտնահարվում են գրեթե ամենուր. Թաթոյանը 13 հազար 140 դիմում է ստացել
Թաթոյանը հայտնեց նաև, որ միջադեպից հետո ՄԻՊ աշխատանքային խմբեր են մեկնել բժշկական կենտրոն և ոստիկանություն: ՄԻՊ-ը պարզաբանումների պահանջով գրություններ է ուղարկել իրավապահներին, որոնց պատասխանները ստանալուց հետո հանդես կգա հայտարարությամբ:
Պաշտպանի պատասխանին արձագանքելով՝ պատգամավորը հայտարարեց, որ նրա հետ ընդհանրապես համամիտ չէ ու հիշեցրեց մեկ այլ դեպք, երբ Մարուքյանը քաղաքացիական ավիացիայի կոմիտեի նախագահ Տաթևիկ Ռևազյանին էր վիրավորել՝ դարձյալ սեռի հիմքով:
«Այո՛, որպես մարդ ինձ համար տհաճ է, երբ իմ երկրի խորհրդարանում նման միջադեպ է տեղի ունենում, բայց ՄԻՊ-ը չի կարող կոնկրետ քաղաքական նշանակության, կոնկրետ մարդկանց հետ կապված գնահատական տալ»,- ասաց Թաթոյանը:
Պաշտպանը նաև հիշեցրեց, որ իր պաշտոնը ոչ թե պաշտոնյային պաշտպանելու համար է, այլ քաղաքացուն, որոշ դեպքերում նաև ընդդիմությանը: Թաթոյանն արձանագրեց, որ միջազգային կանոնի համաձայն` պետական կառավարման մարմիններին անգամ արգելված է դիմել մարդու իրավունքների պաշտպանին:
«Իհարկե, վիրավորական է հղի կնոջ նկատմամբ այդպիսի արտահայտություններ թույլ տալը, բայց մարդու իրաունքների պաշտպանը չի կարող պաշտպանել կառավարման մարմինների ղեկավարներին, դա օրենքն է արգելում»,- ասաց Թաթոյանը:
Հիշեցնենք` ապրիլի 29-ին «Ադեկվադ» միաբանության անդամներից Կոնստանտին Տեր-Նակալյանը Facebook–ի իր էջում գրել էր, որ ԱԺ փոխխոսնակ Ալեն Սիմոնյանը փողոցում հարձակվել է «Ադեկվադ» միաբանության համահիմնադիր Արթուր Դանիելյանի վրա՝ հրապարակելով վերջինիս` արյունոտ դեմքով լուսանկարը։
ԱԺ պատգամավոր Արման Բաբաջանյանն էլ Facebook–ի իր էջում գրել էր, որ հարձակման է ենթարկվել ԱԺ փոխնախագահ Ալեն Սիմոնյանը։ Նա նշել էր, որ Սիմոնյանի հետ հեռախոսազրույց է ունեցել, իսկ պատահարի մասին հայտնել է ոստիկանապետ Արման Սարգսյանին։
Փաշինյանը միտումնավոր է ԼՀԿ–ին պիտակավորում որպես «նախկինների». հայտարարություն
Գիշերը Ալեն Սիմոնյանը ֆեյսբուքյան ուղիղ եթերում հայտարարեց, որ Արթուր Դանիելյանին ապրիլի 29–ին հանդիպել է տուն գնալու ճանապարհին, բարևել նրան, ի պատասխան սեռական բնույթի հայհոյանք ստացել, դրա համար էլ գլխով հարվածել ու ջարդել է նրա քիթը։ Սիմոնյանը հայտարարեց, որ չի զղջում արածի համար, և որ ցանկացած հայ տղամարդ, որն ունի արժանապատվություն, այդ իրավիճակում նույնկերպ կվարվեր։
Ավելի ուշ ՀՔԾ-ն հայտարարեց, որ հարուցվել է քրեական գործ՝ խուլիգանության և դիտավորությամբ առողջությանը թեթև վնաս պատճառելու հատկանիշներով:
