ԵՐԵՎԱՆ, 11 մայիսի – Sputnik. ԱԺ ապրիլյան պատերազմի հանգամանքներն ուսումնասիրող քննիչ հանձնաժողով կհրավիրվի ՀՀ արտաքին գործերի նախկին նախարար Էդվարդ Նալբանդյանը:
«Նալբանդյանին քննիչ հանձնաժողով հրավիրելու նամակն արդեն ուղարկել եմ», - այսօր նիստի ավարտից հետո հայտնեց ԱԺ ապրիլյան պատերազմի հանգամանքներն ուսումնասիրող քննիչ հանձնաժողովի նախագահ Անդրանիկ Քոչարյանը։
Նրա խոսքով` Նալբանդյանն այս պահին Մոսկվայում է, նրան առաջարկել են մինչև մայիսի 18-25-ը ներկայանալ նիստին, հակառակ դեպքում պատրաստ են նրա մասնակցությունը հանձնաժողովի նիստին ապահովել տեսակապի միջոցով։
Հարցին, թե արդյոք ՀՀ նախկին վարչապետ Հովիկ Աբրահամյանին հրավիրելո՞ւ են նիստերից մեկին, Քոչարյանը պատասխանեց, որ նախկինում իրենց ցանկում Աբրահամյանն ընդգրկված է եղել, սակայն ավելի ուշ նրա անունը հանել են այդ ցանկից։
Քոչարյանը հայտնեց նաև, որ Արցախի նախագահ Բակո Սահակյանը նիստին մասնակցելու համաձայնություն տվել է, բայց ամեն ինչ կախված է Նալբանդյանի պատասխաններից։
Հիշեցնենք, որ այսօր ՀՀ նախկին վարչապետ Կարեն Կարապետյանն էր մասնակցում ապրիլյան պատերազմի հանգամանքներն ուսումնասիրող քննիչ հանձնաժողովի նիստին։ Կարապետյանը հայտնել էր, որ հանձնաժողովի անդամների բոլոր հարցերին պատասխանել է։
Մոտ մեկ տարի է, ինչ ԱԺ-ում գործում է 2016 թվականի ապրիլին ծավալված ռազմական գործողությունների հանգամանքների ուսումնասիրման քննիչ հանձնաժողովը։ 2019թ.–ին հանձնաժողովը 21 նիստ է գումարել, հրավիրվել են մեծ թվով զինվորականներ և նախկին ու ներկա բարձրաստիճան պաշտոնյաներ, որոնք պատասխանել են հանձնաժողովին հետաքրքրող հարցերին։
ԱԺ նախագահը պատմեց, թե ինչպես է կազմակերպվել Սերժ Սարգսյանի մուտքը խորհրդարան
Բացի այդ, ՊՆ–ից հանձնաժողով են ուղարկել մեծ ծավալի փաստաթղթեր, որոնցից արդեն ուսումնասիրվել է 2684 էջը` 147 տեքստային և 14 գրաֆիկական քարտեզներով, տեղեկատվական–վերլուծական և հետախուզական, զորքերի կառավարման, օպերատիվ և այլ բնույթի գաղտնի և հույժ գաղտնի փաստաթղթերով։
Նշենք, որ Ապրիլյան պատերազմի հանգամանքներն ուսումնասիրող ԱԺ քննիչ հանձնաժողովի աշխատանքների ավարտը նախանշված է ս.թ. հունիսի 4-ին: Աշխատանքների ավարտին հանձնաժողովը կհրապարակի 2016-ի ապրիլին ծավալված քառօրյա պատերազմի հանգամանքների մասին զեկույց:
Ինչ է ասել Սերժ Սարգսյանն ԱԺ–ում. մանրամասներ դռնփակ նիստից. «Ժողովուրդ»
