ԵՐԵՎԱՆ, 25 մայիսի - Sputnik. ՀՀ վարչապետ Նիկոլ Փաշինյանը վստահ է, որ կա ընդամենը 3 կանոն, որոնց պահպանումը կերաշխավորի և 95 տոկոսով կպաշտպանի մարդկանց կորոնավիրուսով վարակվելուց։ Facebook սոցիալական ցանցի ուղիղ եթերում նա թվարկեց այդ կանոնները։
«Առաջին կանոն․ չախտահանված ձեռքերով դեմքին չդիպչել։
Երկրորդ կանոն․ դիմակ կրել բոլոր հնարավոր վայրերում և առանց դիմակի չզրուցել մարդկանց հետ։
Երրորդ կանոն․ պահպանել սոցիալական հեռավորություն` ազնվազն 1,5 մետր»,-ասաց վարչապետը։
Նրա խոսքով՝ կորոնավիրուսի դեմ պայքարի թիվ մեկ գործոնը պետք է լինի յուրաքանչյուր քաղաքացու անհատական պատասխանատվությունը, պայմանով, որ կառավարությունը հստակ, հասկանալի և տեսանելի քայլեր անի քաղաքացուն կորոնավիրուսով վարակվելուց զերծ պահելու համար։
ՀՀ–ում ևս 6 մարդ է մահացել կորոնավիրուսից. մայրական մահվան առաջին դեպքն է գրանցվել
Անդրադառնալով կորոնավիրուսի դեմ պայքարում իշխանության ռազմավարության ամենամեծ սխալին, վարչապետն ասաց, որ իրենք գուցե չափից ավելի մեծ վստահություն են տածել քաղաքացիների անհատական պատասխանատվության հանդեպ։
Փաշինյանը շեշտեց, որ յուրաքանչյուր քաղաքացի նախևառաջ իր առողջության համար պետք է կանխարգելիչ միջոցների դիմի, այլ ոչ թե կառավարության կամ վարչապետի։ Չէ՞ որ վարակվելով` առաջնահերթ իր ընտանիքին, ընկերներին ու հարազատներին է վարակելու։
Հավելենք, որ Հայաստանում կորոնավիրուսով վարակվածների թիվը վերջին մեկ օրում ավելացել է 452–ով և դարձել 7113։
Այս պահին փաստացի բուժում է ստանում 3842 մարդ, կատարվել է 50 397 թեստավորում, առողջացել են վարակվածներից 3145–ը։
Հայաստանում, ընդհանուր առմամբ, գրանցվել է կորոնավիրուսային հիվանդությունից մահանալու 87 դեպք և մահվան 39 անուղղակի դեպք։
Հիշեցնենք` ՀՀ կառավարությունը մայիսի 14–ի նիստում որոշեց արտակարգ դրությունը երկարացնել ևս մեկ ամսով։ Այն կտևի մինչև հունիսի 13–ը, ժամը 17։00–ը ներառյալ։ Երկարաձգված արտակարգ դրության պայմանները, սակայն, որոշակի փոփոխությունների են ենթարկվել։ Տնտեսական գործունեության շատ տեսակներ թույլատրվել են, բայց սահմանվել են պարտադիր պահանջներ։ Մայիսի 18–ից սկսած աշխատում է նաև հասարակական տրանսպորտը, բայց ուղևորների ու վարորդների համար դիմակ կրելու պարտադիր պահանջով։
Կգնա՞ն կորոնավիրուսով հիվանդների սորտավորման. նախարարը բացատրել է, թե ինչ է դա
