ԵՐԵՎԱՆ, 1 հունիսի — Sputnik. ՀՀ քննչական կոմիտեն տեղեկացնում է, որ Քաջարանի բնակչին առևանգելու քրեական գործով կալանավորվել է 3 անձ:
Ավելի վաղ տեղեկացրել էինք, որ Քաջարանի 4 բնակիչները, նախնական համաձայնության գալով, 2020թ. ապրիլի 29-ին, ժամը 13։30-ի սահմաններում, Քաջարանի Լեռնագործներ փողոցում գործող ավտոկայանատեղիում ոլորելով Շ. Մ.-ի ձեռքերը և բռնելով ոտքերից` մտցրել են Խ. Մ.-ի վարած ավտոմեքենան, առևանգել նրան։ Այնուհետև նրան տեղափոխել են «Աժդանակ» ՍՊ ընկերության տարածք, որտեղ ներկա գտնվող անձանցից մեկը հրացանով կրակել է Շ. Մ.-ի ոտքերին, ծեծել նրան: Դրանից հետո «Տոյոտա-Պրադո» մակնիշի ավտոմեքենայով վերջինիս տեղափոխել են Ագարակ բնակավայրում գտնվող՝ Ա. Պ.-ին պատկանող առանձնատուն, որտեղ կրկին ծեծել են նրան:
Քրեական գործի նախաքննության ընթացքում Ա․ Պ․-ի բնակության վայրում կատարված խուզարկությամբ հայտնաբերվել է առանձնապես խոշոր չափի մարիխուանա տեսակի թմրամիջոց։
Ձեռք բերված ապացույցների համակցությամբ՝ 5 անձի մեղադրանք է առաջադրվել։ Նրանցից 4-ին՝ ՀՀ քրեական օրենսգրքի 131-րդ հոդվածի (մարդուն առևանգելը) 2-րդ մասի 1-ին կետով, իսկ 1-ին՝ ՀՀ քրեական օրենսգրքի 268-րդ հոդվածի (թմրամիջոցների կամ հոգեմետ (հոգեներգործուն) նյութերի ապօրինի շրջանառությունն առանց իրացնելու նպատակի) 3-րդ մասով նախատեսված հանցագործություններ առերևույթ կատարելու համար: Նրանց նկատմամբ որպես խափանման միջոց կալանավորումն ընտրելու վերաբերյալ միջնորդություններ են ներկայացվել դատարան, որոնցից 3-ը, որոնք վերաբերում են մարդուն առևանգելուն, բավարարվել են: Նախաքննությունը շարունակվում է:
Քաջարանում ամեն ինչ սկսվել է ծեծկռտուքից և անձի առևանգումից. ՔԿ–ն մանրամասներ է հայտնել
Հիշեցնենք, որ Քաջարանի բնակիչ Նվեր Խաչատրյանը մայիսի 24–ին սխալմամբ բերման էր ենթարկվել ոստիկանություն, նրա նկատմամբ բռնություն էր կիրառվել։ Նույն օրը լուսադեմին դիմակավորված և զինված ոստիկանները ձերբակալել են Քաջարանի համայնքապետի մերձավոր շրջապատից 4 անձի։ Դրանից հետո բավական մեծ թվով մարդիկ էին հավաքվել Կապանի ոստիկանության առջև, նրանք բողոքի բազմամարդ ակցիա էին իրականացնում։ Այնտեղ էր եկել նաև Սյունիքի մարզպետ Հունան Պողոսյանը։
Կապանի ծեծկռտուքի գործով մեղադրյալներից երկուսին կալանավորել են
Ուշ երեկոյան ոստիկանների հետ հանդիպելուց հետո Քաջարան համայնքի ղեկավար Մանվել Փարամազյանը հավաքվածներին վստահեցրեց, որ ձերբակալվածների նկատմամբ բռնություն չի կիրառվի։ Նրանց տեղափոխեցին Երևան, քրգործի նախաքննությունը կատարվելու է ԱԱԾ–ում։ Դրանից հետո բողոքի ակցիան դադարեցվեց։
