ԵՐԵՎԱՆ, 10 հունիսի – Sputnik. «Բարգավաճ Հայաստան» կուսակցության նախագահ Գագիկ Ծառուկյանի փաստաբանական խումբն այսօր ՀՀ դատախազությունում հանցագործության վերաբերյալ հաղորդում է տվել։ Sputnik Արմենիայի հետ զրույցում տեղեկությունը հայտնեց Գագիկ Ծառուկյանի ներկայացուցիչ Էմին Խաչատրյանը։
Գագիկ Ծառուկյանի կուսակիցները մեկնաբանում են իրենց առաջնորդի մասին հրապարակումները
Խնդիրն այն է, որ սոցցանցում և լրատվական որոշ կայքերում Գագիկ Ծառուկյանի վերաբերյալ 1979 թվականի դատավճիռն էր հրապարակվել ամբողջ ծավալով, որտեղ մանրամասն նկարագրված էր Ծառուկյանի մասնակցությամբ տարիներ առաջ տեղի ունեցած խմբակային բռնաբարության գործով դատավճիռը։
«Պահանջել ենք հարուցել քրեական գործ` քրեական օրենսգրքի 144 (Մարդու անձնական կամ ընտանեկան կյանքի մասին տեղեկություններ ապօրինի հավաքելը, պահելը, օգտագործելը կամ տարածելը) և 308 հոդվածի (պաշտոնեական դիրքի չարաշահում) հոդվածների հատկանիշներով։ Պետք է հայտնաբերվեն մեղավորները, որոնք խախտել են մեր վստահորդի անձնական կյանքի անձեռնմխելիության իրավունքը»,–ասաց Խաչատրյանը։
Նրա խոսքով` դռնփակ դատական նիստով որոշումները հրապարակման ենթակա չեն, բացի այդ, որևէ մեկը չի հրապարակել, որ 2001-ին Վճռաբեկ դատարանի որոշմամբ` Ծառուկյանն արդարացվել է։ Չնայած դրան էլ, ըստ Խաչատրյանի, այդ փաստաթղթերը չեն կարող հանձնվել երրորդ անձի։
Փաստաբանը նշեց, որ իրենք ողջամիտ կասկածներ ունեն, որ այդ փաստաթղթերը պաշտոնատար անձանց անփութության կամ պաշտոնեական դիրքը չարաշահելու արդյունքում կարող էին հայտնվել երրորդ անձի ձեռքում։
Հարցին, թե վստահորդը որևէ միտում տեսնո՞ւմ է այս ամենի մեջ` Խաչատրյանը պատասխանեց, որ զերծ կմնա գնահատականներ տալուց, սակայն վերջին իրողությունները հետևություններ անելու տեղիք պետք է տան։
Գագիկ Ծառուկյանի փաստաբանական խումբը հույս ունի, որ դեպքի առնչությամբ իրավական գնահատականները չեն ուշանա։
Հիշեցնենք, որ հունիսի 5-ին «Բարգավաճ Հայաստան» կուսակցության քաղաքական խորհրդի հրատապ նիստ էր տեղի ունեցել։
Ծառուկյանը նիստի ժամանակ ասել էր, որ մենք երկիր ենք կորցնում ու քաղաքական առողջ ուժերին համախմբման կոչ էր արել։
Նա նշել էր, որ կառավարության բոլոր անդամները պետք է փոխվեն։
«Մեր պաշտոնը չենք օգտագործել բիզնեսներ հիմնելու ու խլելու համար»․ Մակունցը՝ Ծառուկյանին
