ԵՐԵՎԱՆ, 15 հունիսի – Sputnik. ՀՀ վարչապետ Նիկոլ Փաշինյանն այսօր Կենտրոնական բանկի աշխատակազմին ներկայացրեց ԿԲ նորընտիր նախագահ Մարտին Գալստյանին։
«Ակնհայտ է, որ բանկային համակարգը Երրորդ հանրապետության ձեռքբերումներից է։ Մեր կարևորագույն մարտահրավերներից մեկը ֆինանսական գրագիտության բարձրացումն է քաղաքացիների շրջանում և բանկային համակարգն ավելի մարդակենտրոն դարձնելը»,–նշեց ՀՀ վարչապետը։
Հայտնի է, թե երբ է Կենտրոնական բանկի նոր նախագահը գործի անցնելու
Նա հույս հայտնեց, որ նոր նախագահի գալով նոր էջ կբացվի բանկային համակարգում, որը կմեծացնի բանկային համակարգի նկատմամբ հասարակության վստահությունը։ Փաշինյանը նշեց` կարևոր է, որ քաղաքացիները հասկանան, թե ինչպես է աշխատում Հայաստանի բանկային համակարգը և բանկային համակարգի շուրջ նեգատիվ ընկալումներ չձևավորվեն։
ՀՀ վարչապետն ասաց, որ ՀՀ ԿԲ` արդեն նախկին նախագահ Արթուր Ջավադյանը ներգրավված կլինի տնտեսական քաղաքականության մշակման ծրագրերում։ Կան կոնկրետ նախագծեր, որոնց իրագործումը, Փաշինյանի խոսքով, մեծ ձեռքբերում կլինեն Հայաստանի համար։
Հիշեցնենք` ՀՀ Ազգային Ժողովը Մարտին Գալստյանին Կենտրոնական բանկի նախագահի պաշտոնում ընտրեց ապրիլի 17-ին:
Գալստյանի թեկնածությանը կողմ էին արտահայտվել 104 պատգամավոր, դեմ՝ 15-ը:
ՀՀ ԿԲ նոր նախագահը հանդիսանում է Համաշխարհային բանկի միջազգային խորհրդատու / դասախոս: Դասավանդում է Հայաստանի ամերիկյան համալսարանում «Մրցունակություն և կլաստերներ» առարկան: Նույն համալսարանում Հարվարդի բիզնես դպրոցի ծրագրի արտոնագրով դասախոսություններ է կարդում:
2015 թ-ին ճանաչվել է Հայաստանի ամերիկյան համալսարանի լավագույն դասախոս: Ներգրավված է հասարակական գործունեության մեջ, մասնակցել է 50-ից ավել միջազգային մասնագիտական միջոցառումների, մի շարք մասնագիտական հրապարակումների հեղինակ է:
Ամուսնացած է, ունի երեք երեխա:
Կենտրոնական բանկը 500 մլն դոլար է գնել. ՀՀ պատմության մեջ պահուստներն ամենաբարձրն են
