ԵՐԵՎԱՆ, 17 հունիսի – Sputnik. Ոստիկանության պետի հանձնարարությամբ երեկ ԱԱԾ–ի մոտ ոստիկանության գործողություններից դժգոհող ու տուժած լրագրողների միջադեպը կուսումնասիրվի, հայտնում են ոստիկանությունից։
Նշենք, որ երեկ երեկոյան ԱԱԾ շենքից ԲՀԿ ղեկավար Գագիկ Ծառուկյանի դուրս գալուց հետո ոստիկանության գործողությունների հետևանքով առաջացել էր հրմշտոց. տուժել էին լրագրողներ, վնասվել էր լրագրողական տեխնիկա։
«Հարգելի լրագրողներ, ոստիկանությունը բարձր է գնահատում հանրությանը հրատապ տեղեկատվություն տրամադրելու ձեր մասնագիտական ջանքը և զանգվածային լրատվության ներկայացուցիչներին լիարժեք գործընկեր է համարում հասարակական կարգի ապահովման գործում: Ուստի կրկին խնդրում ենք ականաջալուր լինել մեր հորդորին և շարունակել ոստիկանություն-ԶԼՄ գործընկերային հարաբերությունները»,–նշված է հաղորդագրության մեջ:
Մարդու իրավունքների պաշտպան Արման Թաթոյանն էլ հայտնել է, որ լրագրողների մասնագիտական աշխատանքի հետ կապված հարցերն իր անմիջական ուշադրության ներքո են։ Նրա խոսքով` ոստիկանության հետ միջադեպի տեսանյութերը մանրամասն կուսումնասիրեն, և ըստ ուսումնասիրության արդյունքների՝ կորոշեն միջոցների հարցը։ ՄԻՊ–ը կաշխատի նաև լրագրողների հետ անհատապես։
Անդրադառնալով ըմբշամարտիկ Ռոման Ամոյանին բերման ենթարկելու ժամանակ ոստիկանության գործողություններին` Թաթոյանը նշել է, որ խոսել եմ նրա հետ և ՄԻՊ գրասենյակում այդ հարցով նախաձեռնված է առանձին վարույթ։
ԱԱԾ–ի մոտ Գագիկ Ծառուկյանի համակիրների հավաք անցկացնելու դեպքի առթիվ քրգործ է հարուցվել
Հիշեցնենք, որ երեկ ԲՀԿ ղեկավար Գագիկ Ծառուկյանը հարցաքննվում էր ԱԱԾ–ում ինչի հետ կապված էլ նրա աջակիցները, ԲՀԿ–ական պատգամավորները հավաքվել էին ԱԱԾ–ի մոտ։ Դատարանն այսօր կքննի Ծառուկյանին կալանավորելու միջնորդությունը, քանի որ նրա դեմ մի քանի քրգործեր կան հարուցված։
