ԵՐԵՎԱՆ, 18 հունիսի — Sputnik. Այսօր կառավարության նիստում ՀՀ առողջապահության նախարար Արսեն Թորոսյանն ասաց` վերլուծությունները ցույց են տալիս, որ կորոնավիրուսի ամենամեծ տարածման կետերը բակային տարածքներն են:
«Երբ մենք նայում ենք զրուցարանում նստած նարդի խաղացող մեր տարեց քաղաքացիներին, միայն դիմակն է, որ կարող է նրանց փրկել իրար վարակելուց ու հետո ծանր վիճակում ռեանիմացիայում հայտնվելուց: Սա այն պարզ գիտակցումն է, որին մինչև չհասնենք, չենք կարողանալու դիմակայել այդ մարտահրավերին»,- ասաց Թորոսյանը:
Հանրային կուտակման այլ վայրերում՝ կենտրոնական փողոցներում, տնտեսվարող սուբյեկտներում կատարված վարչարարության շնորհիվ, ըստ Թորոսյանի, իրավիճակն այսօր շատ ավելի լավ է, քան բակային տարածքներում, սգո և ուրախության արարողություններում ու այլ հավաքներում:
«Դրանք շատ մեծ վտանգ են ներկայացնում դրանց մասնակիցների համար: Ես պարզապես չեմ պատկերացնում, թե ինչպես կարելի է նման անտարբերություն ցուցաբերել մեր ծնողների, մեր հյուրերի ծնողների, մեր ամենահարազատ մարդկանց նկատմամբ: Այս գիտակցումը մենք պետք է ունենանք, որովհետև հիվանդացող քաղաքացիների տարիքասեռային կազմը ցույց է տալիս, որ դա կարող է լինել ցանկացած մեկիս հարազատը, մեր ծնողը, իմ տատիկն ու պապիկը, ովքեր ունեն զարկերակային բարձր ճնշում ու այլ հիվանդություններ»,- ասաց Թորոսյանը:
Ներկայացնելով առկա վիճակագրությունը՝ նախարարը նշեց, որ այսօր առավոտյան 09:00-ի դրությամբ 143 քաղաքացի կարիք ունեն հոսպիտալացման: Նրանցից 25-ը գտնվում են տանը:
Գիտնականները զգուշացրել են` ապաքինվելուց հետո կորոնավիրուսի հակամարմիններն անհետանում են
«Բարեբախտաբար, 80 և ավելի ցածր թթվածնային պարունակությամբ քաղաքացիներ, որոնք համարվում են ծանր, այս պահին տանը չունենք: Սակայն ունենք բազմաթիվ քաղաքացիներ, որոնք գտնվում են այլ բժշկական կենտրոններում, որտեղ նեղ մասնագիտական կորոնավիրուսային բուժում չի իրականացվում և կարիք ունեն տեղափոխվելու այլ մասնագիտացված հիվանդանոցներ»,- ասաց Թորոսյանը:
Նախարարը հայտնեց, որ կորոնավիրուսային բուժման տեղերի ավելացման արդյունքում այսօր ՀՀ-ում 263 մահճակալ է տրամադրված կորոնավիրուսային հիվանդների վերակենդանացման նպատակով ու ազատ տեղեր գրեթե չեն լինում:
Ի դեպ 2 շաբաթ առաջ այդ մահճակալների թիվը 200 էր:
444 քաղաքացի ներկա պահին գտնվում է ծանր, 131-ը` ծայրահեղ ծանր վիճակում, որոնցից 39-ը միացված են թոքերի արհեստական օդափոխության սարքերին:
Հիշեցնենք` Հայաստանում կորոնավիրուսով վարակվածների թիվը վերջին մեկ օրում ավելացել է 665–ով և հասել 18698-ի։
Այս պահին փաստացի բուժում է ստանում 10 728 մարդ, կատարվել է 89 992 թեստավորում, առողջացել են վարակվածներից 7560–ը (+746) ։ Գրանցվել է մահվան 309 (+7) դեպք։
Այլ պատճառներով մահվան դեպքերի ընդհանուր թիվը 99 է (+3)։
Կորոնավիրուսից մահացել են 7 պացիենտ. ամենաերիտասարդը 62–ամյա մի տղամարդ է
