ԵՐԵՎԱՆ, 18 հունիսի – Sputnik. Արարատի մարզում գտնվող Խոսրովի անտառ պետական արգելոցում հրդեհ է բռնկվել։ Համաձայն Արտակարգ իրավիճակների նախարարության հաղորդագրության՝ տեղում աշխատում են 40 հրշեջ-փրկարարներ, տեղազննման համար օդ է բաձրացվել անօդաչու թռչող սարք, դեպքի վայր է մեկնել ուղղաթիռ։ Հրդեհաշիջման աշխատանքներին մասնակցում են նաև Խոսրովի արգելոցի և արգելոցին կից գործող Վայրի բնության և մշակութային արժեքների պահպանման հիմնադրամի աշխատակիցները։
Խոսրովի անտառ տանող ճանապարհի հրդեհը մեկուսացվել է. տեսանյութ
Հիմնադրամի աշխատակից Տիգրան Անդրեասյանը Sputnik Արմենիայի հետ երկար չկարողացավ զրուցել, ասաց՝ հենց հիմա բարձրանում են այն վայրը, որտեղից ծուխ է նկատվում։
«Հրդեհը հիմնական ճանապարհից 200-300 մետրի վրա է, վերևում՝ ժայռերի մեջ։ Հրդեհի խոշորության մասին հիմա չեմ կարող ոչինչ ասել, ամեն դեպքում, եթե ուշացնենք աշխատանքները, այն ճակատագրական կլինի», - ասաց Անդրեասյանը։
Հրդեհը բռնկվել է արգելոցի «Քյոսոս» կոչվող հատվածում։
Հիշեցնենք, որ երեք տարի առաջ՝ 2017-ի օգոստոսին, Խոսրովի անտառում բռնկվել էր անկախ Հայաստանի պատմության մեջ ամենախոշոր հրդեհը։ Հրդեհաշիջման աշխատանքները տարվում էին օրուգիշեր, դրանց մասնակցում էին 500-ից ավելի մարդ, տեղի աշխատակիցներին միացել էին ՊՆ զինծառայողներ, գյուղացիներ։ Իսկ չորրորդ օրը հայկական ուժերին օգնության հասավ Ռուսաստանից եկած մեկ ինքնաթիռ։
Հրդեհն ամբողջությամբ մարվեց միայն մեկ ամիս անց։ Արգելոցում այրվեց 2500 հա տարածք՝ ահռելի վնաս հասցնելով արգելոցի բնությանը։
«Խոսրովի անտառ» արգելոցի հարակից տարածքում հրդեհ է. տեսանյութ
