ԵՐԵՎԱՆ, 18 հունիսի – Sputnik․ Ոստիկանները դիմակ չդնելու համար տուգանեցին «Բարգավաճ Հայաստան» կուսակցության պատգամավոր Նորա Առուստամյանին։ Առուստամյանն իր գործընկերների և կուսակցության համակիրների հետ Երևանի ընդհանուր իրավասության դատարանի Շենգավիթի նստավայրի դիմաց էր, երբ նրան մոտեցան երկու ոստիկան և տուգանեցին։
Տուգանքը նույնիսկ գյումրեցիներին է ստիպել կարգապահ դառնալ
Դատարանում քննվում է կուսակցության առաջնորդ Գագիկ Ծառուկյանի կալանավորման միջնորդության հարցը։
Պատգամավորը լրագրողների հետ զրույցում հայտնեց, որ իր մոտ կար դիմակ, սակայն այն կտորից էր, իսկ ինքը տեղեկացել է, որ առողջապահության նախարար Արսեն Թորոսյանը հորդորել է այդ դիմակներն այլևս չդնել։
«Ես հանեցի դիմակս, փորձում էի մարդկանցից իմանալ՝ ունի՞ արդյոք որևէ մեկը բժշկական դիմակ, թե ոչ, երբ տուգանեցին։ Ընդամենը հետևում էի առողջապահության նախարարի հորդորին, որն ասել էր, որ կտորից դիմակը վնաս է։ Խորհուրդ կտամ նախարարին` կողմնորոշված կոչ անել, մարդիկ էլ իմանան՝ ինչ դիմակ դնեն»-ասաց պատգամավորը։
Այնուամենայնիվ, Առուստամյանը չվիճեց ոստիկանների հետ, նա հանգիստ լսում էր նրանց և պատրաստակամ վճարեց տուգանքը։ Լրագրողներին նա ասաց, որ ոստիկաններն ընդամենը իրենց աշխատանքն են անում, և ինքը չի ուզում նրանց համար խնդիրներ ստեղծել։
Հիշեցնենք, որ ավելի վաղ դիմակ չդնելու համար ոստիկանները տուգանել էին «Բարգավաճ Հայաստանից» Դավիթ Մանուկյանին, որը նաև Ծառուկյանի փեսան է, և Գևորգ Պետրոսյանին։
Նշենք, որ Հայաստանում մարտի 16-ին հայտարարվեց արտակարգ իրավիճակ, այն երկարացվեց 3 անգամ, և կրկին չերկարացվելու դեպքում կավարտվի հուլիսի 13-ին։ Դիմակներ կրելը պարտադիր դարձավ մայիսի 25-ից։
Դիմակ չկրողները տուգանվում են 10 հազար դրամով։
