ԵՐԵՎԱՆ, 23 հունիսի – Sputnik. ՀՀ վարչապետ Նիկոլ Փաշինյանը Facebook սոցիալական ցանցի ուղիղ եթերում հայտարարեց, որ կորոնավիրուսի տնտեսական հետևանքները չեզոքացնելու իրենց պայքարը դրական դինամիկա ունի, մասնավորապես վերականգնվում են փակված աշխատատեղերը։
«Մենք հասկացանք, որ պետք է որդեգրենք կորոնավիրուսի հետ ապրելու ռազմավարություն, որովհետև եթե միայն կենտրոնանանք առողջապահական սեգմենտի վրա, կունենանք տնտեսական փլուզում։ Մեր այս մոտեցումը հիմնավորել է իր ճշմարիտ լինելը։ Մայիսին վերականգնվել է ապրիլին փակված 71 հազար 471 աշխատատեղերից 50 հազար 94-ը: Ընդ որում` դրանք միայն վճարվող աշխատատեղերն են, որովհետև կան դեպքեր, երբ մարդը փաստացի աշխատում է, բայց դեռ աշխատավարձ չի ստացել։ Վերականգնման այդ գործընթացը շարունակվում է»,-ասաց Փաշինյանը:
Վարչապետի խոսքով՝ սա չի նշանակում, որ իրենք տնտեսական բարդությունը հաղթահարել են, այլ նշանակում է, որ իրենք աշխատատեղերի վերականգնման պրոցես են սկսել։
Փաշինյանը նշեց, որ իր ներկայացրած վիճակագրությունի չի կարող կասկածելի համարվել, քանի որ ձևավորվում է գործատուների ներկայացրած հաշվետվությունների հիման վրա, իսկ այդ հաշվետվություններով էլ գործատուները հարկ են վճարում, այսինքն` եթե շատ գրեն, շատ էլ պետք է վճարեն։
«Հակահամաճարակային կանոնների պահպանման ցուցանիշները կարծես թե հիմա լավացել են, բայց էլի մեր հակահամաճարակային իրավիճակը մնում է լարված։ Եթե, Աստված չանի, մեր թվերը ավելի մեծանան, միգուցե մենք կորցնենք ավելի շատ աշխատատեղեր, այս պարագայում գուցե տնտեսության վերականգնումը կա՛մ արագ չլինի, կա՛մ հնարավոր չլինի։ Իմ կոչն է պահել հակահամաճարակային կանոնները»,– շեշտեց վարչապետը։
Հիշեցնենք` կառավարությունը կորոնավիրուսի հետևանքների չեզոքացման համար 20 միջոցառում է ընդունել, որոնց մի մասը սոցիալական բնույթ ունի, մյուսը` տնտեսական։
Կորոնավիրուսի տնտեսական հետևանքները չեզոքացնող ծրագրերը վերաբերում էին ռեզիդենտ տնտեսվարողներին, գյուղատնտեսության ոլորտին, ՓՄՁ-ներին, աշխատակիցների և աշխատատեղերի պահպանմանը, միկրոձեռնարկատիրություններին, բարձր տեխնոլոգիաների ոլորտին, «զրոյից» բիզնես ստեղծելու ձգտում ունեցողներին։
Իսկ սոցիալական հետևանքները չեզոքացնող ծրագրերը վերաբերում էին մինչև 14 տարեկան երեխա ունեցող ընտանիքներին, որտեղ ծնողները կամ ծնողներից մեկը կորցրել է իր գրանցված աշխատանքը մարտի 13-25 ընկած ժամանակահատվածում և մարտի 25-ի դրությամբ ծնողներից ոչ մեկը չուներ աշխատանք, մարտի 13-30 ընկած ժամանակահատվածում աշխատանքից ազատված անձանց, չաշխատող հղի կանանց, վարձու աշխատողներին կամ անհատ ձեռնարկատերերին, որոնք զրկվել էին աշխատանքից, 0-18 տարեկան երեխա ունեցող ընտանիքներին, որտեղ երկու ծնողներն էլ չունեին գրանցված աշխատանք, սոցիալապես անապահով ընտանիքներին, ուսանողներին։
Հայաստանում ախտորոշվել է կորոնավիրուսի 418 նոր դեպք. ընդհանուր վարակվածների թիվը 21006 է
