ԵՐԵՎԱՆ, 3 հուլիսի - Sputnik. Հայաստանի Հանրապետության նախագահ Արմեն Սարգսյանի հրամանագրերով երաժշտության, արվեստի, սպորտի բնագավառների մի խումբ ներկայացուցիչներ արժանացել են պետական բարձր պարգևների՝ իրենց ոլորտների զարգացման գործում ներդրած նշանակալի ավանդի համար:
«Ուրախ եմ, որ երկար տարիների ձեր հայրենանվեր ներդրումը գնահատվում է ոչ միայն շքանշանով, այլև մեր ժողովրդի կողմից: Քաջալերում եմ այն գործունեությունը, որ իրականացրել եք վերջին տարիներին և վստահ եմ, որ շարունակելու եք նույն եռանդով և նվիրումով»,–նախագահի նստավայրում այսօր տեղի ունեցած պարգևատրման հանդիսավոր արարողության ժամանակ ասել է Սարգսյանը:
Պարգևների արժանացած գործիչներն իրենց հերթին շնորհակալություն են հայտնել նույնիսկ ներկայիս դժվարին իրավիճակում իրենց վաստակը գնահատելու և արժևորելու համար:
Կոմիտասի անվան ազգային քառյակի 1-ին ջութակահար, գեղարվեստական ղեկավար Էդուարդ Թադևոսյանը նախագահի լրատվական ծառայության հետ զրույցում նշել է, որ չնայած իր տարիքին, այսուհետ ևս պետք է աշխատի բարձր պահել հայ երաժշտական մշակույթի պատիվը:
Գրականագետ Ավետիք Իսահակյանն էլ նշել է, որ հատկապես այս ճակատագրական օրերին ստացած պարգևը մեծ պատասխանատվություն է առաջացնում:
«Հայ ժողովրդին միշտ հատուկ է եղել և՛ պայքարել, և՛ դժվարությունները մաքառելով հաղթել, այնպես որ, ես հավատացած եմ, որ այս էլ կանցնի, և մեր ժողովուրդը, մեր մշակույթը, մեր գիտականներն ավելի մեծ նվիրումով կշարունակեն իրենց գործը»,- ասել է Իսահակյանը:
ՀՀ նախագահի կողմից իրենց ոլորտների զարգացման գործում ներդրած նշանակալի ավանդի համար պետական բարձր պարգևների են արժանացել նաև Կոմիտասի անվան ազգային քառյակի ալտահար Ալեքսանդր Կոսեմյանը, 2-րդ ջութակահար Սյուզի Երիցյանը, քառյակի տնօրեն Սամվել Մեսրոպյանը, ինչպես նաև թավջութակահար Արամ Թալալյանը, և Համահայկական խաղերի երևանյան գրասենյակի ղեկավար Դավիթ Չիբուխչյանը:
