22:59 06 օգոստոսի 2020
Ուղիղ եթեր
  • USD485.18
  • GBP639.27
  • EUR575.37
  • RUB6.62
Հայաստան
Ստանալ կարճ հղումը
19010

Մարդու իրավունքների պաշտպանը ոստիկանների այցերի հիման վրա վարույթ է հարուցել և մտադիր է ՀՌՀ-ի հետ քննարկումներ նախաձեռնել:

ԵՐԵՎԱՆ, 3 հուլիսի – Sputnik. ՀՀ Մարդու իրավունքների պաշտպանը վարույթ է նախաձեռնել ոստիկանության ծառայողների` հայաստանյան երկու հեռուստաընկերություններ այցելելու փաստով: Տեղեկությունը հայտնում է ՄԻՊ-ի մամուլի ծառայությունը։

«Մարդու իրավունքների պաշտպանի կողմից պարզաբանումներ կպահանջվեն ՀՀ ոստիկանությունից՝ նշված լրատվամիջոցներում կատարած գործողությունների և նախաձեռնված վարույթների առնչությամբ»,- նշված է Facebook–ում հրապարակված հաղորդագրության մեջ:

Պաշտպանի գրասենյակը նաև հայտնում է, որ հաշվի առնելով ՀՌՀ-ի կարևոր դերը զանգվածային լրատվության միջոցների գործունեության ոլորտում` Մարդու իրավունքների պաշտպանը մտադիր է ՀՌՀ-ի հետ այդ թեմայով քննարկումներ նախաձեռնել:

Ինչպես արդեն հայտնել ենք, այսօր՝ հուլիսի 3-ին, օրվա ընթացքում ոստիկաններն այցելել էին «Արմնյուզ» և «5-րդ ալիք» հեռուստաընկերություններ ու վարչական վարույթներ հարուցել՝ եթերում հաղորդավարների՝ առանց դիմակի աշխատելու հիմքով:

Հեռուստաընկերություններում տեղի ունեցած դեպքերին արձագանքել էր նաև ՀՌՀ նախագահ Տիգրան Հակոբյանը:

«Որպես կարգավորող մարմնի ղեկավար` ինձ համար տհաճ է, երբ ոստիկանությունը այցելում է (անկախ այցելության պատճառներից) ցանկացած հեռարձակողի գրասենյակ: Լավ կլիներ` այդպիսի այցելություններ չլինեին: Ավելի տհաճ է, երբ այդպիսի այցելությունը քաղաքական շահարկման առիթ է դառնում և մանիպուլյատիվ հնարքներով հիշատակվում է իմ անունը»,- Facebook-ում գրել է Հակոբյանը:

Բանն այն է, որ «Արմնյուզի» հաղորդավար Լիկա Թումանյանը եթերում դիմակ չդնելը հիմնավորել էր շուրջ մեկ ամիս առաջ Տիգրան Հակոբյանի հարցազրույցներից մեկում արտահայտված այն մտքով, որ հեռուստատաղավարներում պարտադիր դիմակով նկարահանում անելու` պարետի որոշում չկա:

«Խոսքը, բնականաբար, մեկ հաղորդավարի մասին է (երբ երկուսն են, դա պարտադիր է, և այդ պահանջը կարծես չի վիճարկվում)»,- իր արտահայտությունը մեկնաբանում է ՀՌՀ նախագահը՝ միաժամանակ շեշտելով, որ ինքն ասել է` «որքանով ես գիտեմ», քանի որ ինքն էլ համոզված չի եղել՝ պարետի որոշումները հստակ պարտադրում են հաղորդավարին եթերում մենակ լինելով դիմակ դնել, թե ոչ:

Հակոբյանը նաև հայտնել էր, որ հեռարձակողների տնօրենների հետ խոսելիս միշտ խնդրել է դիմակ դնել:

Իսկ ինչ վերաբերում է ոստիկանության կողմից վարչական վարույթ հարուցելու միջոցով լրատվամիջոցների դեմ արշավ սկսելու մասին մեկնաբանություններին, Հակոբյանը կարծիք էր հայտնել, որ «կասկածում է, որ արշավները 10 հազար դրամանոց տուգանքներից են սկսվում, հատկապես, որ նախորդ օրը կառավարության որոշումով մայրաքաղաքային ծածկույթ ունեցող յուրաքանչյուր հեռուստատեսության հատկացվեց 250 անգամ ավելի մեծ գումար»:

Հիշեցնենք, որ մայիսի 25-ից Հայաստանում «դիմակային ռեժիմ» է սահմանվել։ Քաղաքացիները պետք է դիմակ դնեն հանրային տրանսպորտում, փակ տարածքներում, տաքսիներում և անձնական ավտոմեքենաներում։

Իշխանությունը կարծում է, որ այդպես հնարավոր կլինի կանխել երկրում կորոնավիրուսային վարակի տարածումը։

Հայաստանում արտակարգ դրության ռեժիմը երկարացվել է մինչև հուլիսի 13-ը։

Ըստ թեմայի

Ոստիկանները դիմակներ են բաժանում փողոցում և արձանագրություն կազմում. տեսանյութ
Ինչո՞ւ դիմակով չեք․ ճապոնացին ոտքով հասել է Հայաստան ու համավարակի պատճառով մնացել այստեղ
Շուկայում պաշտպանիչ դիմակների պրոֆիցիտ կա. գործարանային դիմակը կարող է դառնալ պարտադիր
թեգերը:
Ոստիկանություն, «5–րդ ալիք» ՀԸ, «Արմնյուզ» ՀԸ, Արման Թաթոյան, Հայաստան

Գլխավոր թեմաներ