ԵՐԵՎԱՆ, 7 հուլիսի - Sputnik. Համավարակի տարածման պայմաններում բեռնատարների որոշ վարորդներ, օգտվելով ստեղծված իրավիճակից, փորձում են շրջանցել մաքսային հսկողությունն ու հանրապետություն ներկրել թաքցրած ապրանքներ: ՊԵԿ մամուլի ծառայությունը տեղեկացնում է, որ օրերս նման երկու դեպք է հայտնաբերվել։
Դեպքերից մեկով Բագրատաշենի մաքսակետում Վրաստանից ժամանած՝ ՀՀ քաղաքացու կողմից շահագործվող բեռնատարի տեսազննման արդյունքում կցորդի ներքևի հատվածում հատուկ պատրաստված թաքստոցից հայտնաբերվել է մաքսային հսկողությունից թաքցրած նոր հագուստ:
«Մեկ այլ դեպքով էլ՝ կրկին Բագրատաշենի մաքսակետում, բացահայտվել է մաքսային կանոնների խախտման հերթական դեպքը: Մաքսային տեսուչի հարցմանն ի պատասխան՝ բեռնատարի վարորդը նշել է, որ մեքենայում հայտարարագրման ենթակա են միայն պահեստամասերը: Այնինչ, բեռնատարի սրահի տեսազննման արդյունքում հայտնաբերվել են մաքսային հսկողությունից թաքցրած տարբեր մոդելի բջջային հեռախոսներ»,- նշված է հաղորդագրության մեջ։
ՊԵԿ նոր նախագահը մտահոգված է հարկերի հավաքագրման ցուցանիշներով
Դեպքերի առթիվ մաքսային կանոնների խախտման վերաբերյալ կազմվել է արձանագրություն:
ՊԵԿ-ը հորդորում է քաղաքացիներին զերծ մնալ մաքսային կանոնները խախտելուց՝ հիշեցնելով, որ կոմիտեն հետևողականորեն շարունակում է հսկողական միջոցառումներ իրականացնել իրավախախտումների բացահայտման ուղղությամբ: Կոմիտեն նախազգուշացնում է՝ օրենքի շրջանցման յուրաքանչյուր փորձ բացահայտվելու է ՊԵԿ աշխատակիցների խիստ հսկողության արդյունքում:
Մաքսատուրքի տարբերության վերահաշվարկմամբ 57 մլն դրամ վերադարձվել է տնտեսվարողներին
