ԵՐԵՎԱՆ, 7 հուլիսի – Sputnik. Գյումրիում բնակվող 92-ամյա Մնացական Ջանոյանն այսօր անակնկալ հյուրեր ունեցավ։ Պապիկին այցի էին եկել հաճելի առաքելությամբ՝ նրան Հաղթանակի 75-ամյակին նվիրված հուշամեդալ փոխանցելու: Նման հուշամեդալ ու դրամական պարգև այսօր ստացան Շիրակի մարզի 21 վետերան:
Անակնկալը հայ վետերաններին ՌԴ նախագահ Վլադիմիր Պուտինի անունից էր: Հաղթանակի 75-ամյակի առթիվ վետերաններին հատկացվել է նաև 30 հազար 500 դրամ գումար: Շիրակի մարզում պարգևատրված 21 վետերաններից 11-ը Գյումրիից էին, մյուսները՝ մարզի այլ համայնքներից:
«17 տարեկան գնացի ծառայության, մեզ տարան Աջարիա՝ Թուրքիայի հետ սահման: Մտավախություն կար, որ Ստալինգրադը հենց գերմանացիները գրավեն, թուրքերն էլ այս կողմից կանցնեն սահմանը: Մահվան ու կյանքի հարց էր: Ես դիպուկահար էի, ու ցանկացած սահմանախախտման փորձ իմ կողմից ձախողման էր ենթարկվում»,-պատմում է Մնացական պապը, հետո էլ ավելացնում, որ մեդալներ շատ ունի, բայց այս մեկն էլ իր կարևոր տեղը կունենա։
Համավարակի պատճառով հնարավոր չեղավ բոլոր վետերանների տուն այցելել ու պարգևն անձամբ նրանց հանձնել։ Ոմանց զավակներն էին եկել Գյումրու վետերանների միություն` պարգևը ստանալու:
Պետրոս Հակոբյանը, օրինակ, մոր` պատերազմի վետերան Արուսյակ Ֆահրադյանի պարգևներն էր եկել տանելու: «Մայրս զենիթա-հրետանային զորքերում կռվել է Հյուսիսային Կովկասում և հասել է միչև Հեռավոր Արևելք: 18 տարեկանում կամավոր է մեկնել ռազմաճակատ Վանաձորի մանկավարժական ինստիտուտից»,-պատմում է որդին՝ հավելելով, որ շատ ուրախալի է, որ այսքան տարի հետո մեր վետերանները չեն մոռացվում:
Հայերի ավանդը Հայրենական մեծ պատերազմում
Մայիսի 1-ի տվյալներով` մեր հանրապետությունում կա 262 վետերան, նրանցից 21–ը բնակվում է Շիրակում: «Այս պարգևները վետերաններին պետք է տրվեր մայիսի 9-ին, սակայն, ստեղծված իրավիճակի պատճառով, միայն այսօր հնարավոր դարձավ նրանց հանձնել պարգևները»,-լրագրողների հետ զրույցում ասաց Հայաստանի վետերանների միավորում հասարակական կազմակերպության նախագահ, պահեստազորի գնդապետ Սիմոն Եսայանը:
Խոսելով հաղթանակի 75- ամյակին նվիրված շքերթից` Սիմոն Եսայանը նշեց, որ Հայաստանից, ըստ նախնական պայմանավորվածության, Մոսկվա մեկնելու ու հաղթական շքերթին մասնակցելու էր 5 վետերան, սակայն համավարակի պատճառով, վետերանների առողջությունից ելնելով, նրանք չմեկնեցին ՌԴ: Ի դեպ, ըստ Սիմոն Եսայանի, Հայաստանը միակ երկիրն է որտեղ վետերանները ստանում են պատվովճար՝ 100 հզ դրամի չափով: ՀՀ կառավարության որոշմամբ ` Հաղթանակի 75- ամյակի առթիվ բոլոր վետերաններին տրվեց 300 հզ դրամ միանվագ գումար:
